1147. උච්චමිදං මණිථූණං විමානං
සමන්තතො ද්වාදස යොජනානි
කූටාගාරා සත්තසතා උළාරා
වෙළුරියත්ථම්භා රුචකත්ථතා සුභා

1148. තත්ථච්ඡසි පිවසි ඛාදසි ච
දිබ්බා ච වීණා පවදන්ති වග්ගුං
දිබ්බා රසා කාමගුණෙත්ථ පඤ්ච
නාරියො ච නච්චන්ති සුවණ්ණඡන්නා

1149. කෙන තෙ තාදිසො වණ්ණො කෙන තෙ ඉධ මිජ්ඣති,
උප්පජ්ජන්ති ච තෙ භොගා යෙ කෙචි මනසො පියා

1150. දෙවිද්ධිපත්තොසි මහානුභාවො
මනුස්සභූතො කිමකාසි පුඤ්ඤං
කෙනාසි එවං ජලිතානුභාවො
වණ්ණො ච තෙ සබ්බදිසා පභාසතීති.

1151. සො දෙවපුත්තො මොග්ගල්ලානෙන පුච්ඡිතො.
පඤ්හං පුට්ඨො වියාකාසි යස්ස කම්මස්සිදං ඵලං

1152. ගිම්හානං පච්ඡිමෙ මාසෙ පතපන්තෙ දිවාකරෙ
පරෙසං භතකො පොසො අම්බාරාමමසිඤ්චති

1153. අථ තෙනාගමා භික්ඛු සාරිපුත්තොති විස්සුතො
කිලන්තරූපො කායෙන අකිලන්තොව චෙතසා

1154. තඤ්ච දිස්වාන ආයන්තං අවොචං අම්බසිඤ්චකො,
සාධු තං භන්තෙ නහාපෙය්යං යං මමස්ස සුඛාවහං

1155. තස්ස මෙ අනුකම්පාය නික්ඛිපි පත්තචීවරං
නිසීදි රුක්ඛමූලස්මිං ඡායාය එකචීවරො

1156. තඤ්ච අච්ඡෙන වාරිනා පසන්නමානසො නරො
නහාපයී රුක්ඛමූලස්මිං ඡායාය එකචීවරං

1157. අම්බො ච සිත්තො සමණො ච නහාපිතො
මයා ච පුඤ්ඤං පසුතං අනප්පකං
ඉති සො පීතියා කායං සබ්බං ඵරති අත්තනො

1158. තදෙව එත්තකං කම්මං අකාසිං තාය ජාතියා
පහාය මානුසං දෙහං උපපන්නොම්හි නන්දනං

1159. නන්දනෙ පවනෙ රම්මෙ නානාදිජගණායුතෙ
රමාමි නච්චගීතෙහි අච්ඡරාහි පුරක්ඛතොති.

1160. දිස්වාන දෙවං පටිපුච්ඡි භික්ඛු
උච්චෙ විමානම්හි චිරට්ඨිතිකෙ
ආමුත්තහත්ථාභරණං යසස්සිං
දිබ්බෙ විමානම්හි යථාපි චන්දිමා.

1161. අලඞ්කතො මාලභාරී සුවත්ථො
සුකුණ්ඩලී කප්පිතකෙසමස්සු
ආමුත්තහත්ථාභරණො යසස්සී
දිබ්බෙ විමානම්හි යථාපි චන්දිමා.