1284. උච්චමිදං මණිථූණං විමානං
සමන්තතො ද්වාදස යොජනානි
කූටාගාරා සත්තසතා උළාරා
වෙළුරියත්ථම්හා රුචකත්ථතා සුභා

1285. තත්ථච්ඡසි පිවසි ඛාදසි ච
දිබ්බා ච වීණා පවදන්ති වග්ගුං
දිබ්බා රසා කාමගුණෙත්ථ පඤ්ච
නාරියො ච නච්චන්ති සුවණ්ණඡන්නා.

1286. කෙන තෙ තාදිසො වණ්ණො
කෙන තෙ ඉධමිජ්ඣති
උප්පජ්ජන්ති ච තෙ භොගා
යෙ කෙචි මනසො පියා

1287. පුච්ඡාමි තං දෙව මහානුභාව
මනුස්සභූතො කිමකාසි පුඤ්ඤං
කෙනාසි එවං ජලිතානුභාවො
වණ්ණො ච තෙ සබ්බදිසා පභාසතීති.

1288. සො දෙවපුත්තො අත්තමනො මොග්ගල්ලානෙන පුච්ඡිතො,
පඤ්හං පුට්ඨො වියාකාසි යස්ස කම්මස්සිදං ඵලං.

1289. දුන්නීක්ඛිත්තං මාලං සුනික්ඛිපිත්වා
පතිට්ඨපෙත්වා සුගතස්ස ථූපෙ
මහිද්ධිකො චම්හි මහානුභාවො
දිබ්බෙහි කාමෙහි සමඞ්ගිභූතො.

1290. තෙන මෙ තාදිසො වණ්ණො තෙන මෙ ඉධමිජ්ඣති,
උප්පජ්ජන්ති ච මෙ භොගා යෙ කෙචි මනසො පියා.

1291. අක්ඛාමි තෙ භික්ඛු මහානුභාව
මනුස්සභූතො යමහං අකාසිං
තෙනම්හි එවං ජලිතානුභාවො
වණ්ණො ච මෙ සබ්බදිසා පභාසතීති.

ද්වෙ දළිද්දා ද්වෙ විහාරා භතකො ගොපාලකන්ථකා
අනෙකවණ්ණා මට්ටකුණ්ඩලී සෙරිස්සකො සුනික්ඛිත්තං
පුරිසානං තතියො වග්ගොති.