6. 3.
1061. උච්චමිදං මණිථූණං විමානං
සමන්තතො සොළස යොජනානි
කූටාගාරා සත්තසතා උළාරා
වෙළුරියත්ථම්හා රුචකත්ථතා සුභා
1062. තත්ථච්ඡසි පිවසි ඛාදසි ච
දිබ්බා ච වීණා පවදන්ති වග්ගුං
අට්ඨට්ඨකා සික්ඛිතා සාධුරූපා
දිබ්බා ච කඤ්ඤා තිදසචරා උළාරා
නච්චන්ති ගායන්ති පමොදයන්ති
1063. දෙවිද්ධිපත්තොසි මහානුභාවො
මනුස්සභූතො කිමකාසි පුඤ්ඤං
කෙනාසි එවං ජලිතානුභාවො
වණ්ණො ච තෙ සබ්බදිසා පභාසතීති
1064. සො දෙවපුත්තො අත්තමනො මොග්ගල්ලානෙන පුච්ඡිතො,
පඤ්හං පුට්ඨො වියාකාසි යස්ස කම්මස්සිදං ඵලන්ති
1065. ඵලදායී ඵලං විපුලං ලභති
දදමුජ්ජුගතෙසු පසන්නමානසො
සො හි මොදති සග්ගගතො තිදිවෙ
අනුභොති ච පුඤ්ඤඵලං විපුලං
තථෙවාහං මහාමුනි අදාසිං චතුරො ඵලෙ
1066. තස්මාහි ඵලං අලමෙව දාතුං
නිච්චං මනුස්සෙන සුඛත්ථිකෙන
දිබ්බානි වා පත්ථයතා සුඛානි
මනුස්සසොභග්ගතමිච්ඡතා වා
1067. තෙන මෙ තාදිසො වණ්ණො තෙන මෙ ඉධමිජ්ඣති,
උප්පජ්ජන්ති ච මෙ භොගා යෙ කෙචි මනසො පියා
1068. අක්ඛාමි තෙ භික්ඛු මහානුභාව
මනුස්සභූතො යමකාසි පුඤ්ඤං
තෙනම්හි එවං ජලිතානුභාවො
වණ්ණො ච මෙ සබ්බදිසා පභාසතීති.
ඵලදායකවිමානං
6. 4.
1069. චන්දො යථා විගතවලාහකෙ නභෙ
ඔභාසයං ගච්ඡති අන්තළික්ඛෙ
තථූපමං තුය්හමිදං විමානං
ඔභාසයං තිට්ඨති අන්තළික්ඛෙ
1070. දෙවිද්ධිපත්තොසි මහානුභාවො
මනුස්සභූතො කිමකාසි පුඤ්ඤං
කෙනාසි එවං ජලිතානුභාවො
වණ්ණො ච තෙ සබ්බදිසා පභාසතීති
1071. සො දෙවපුත්තො අත්තමනො මොග්ගල්ලානෙන පුච්ඡිතො,
පඤ්හං පුට්ඨො වියාකාසි යස්ස කම්මස්සිදං ඵලන්ති
1072. අහඤ්ච භරියා ච මනුස්සලොකෙ
උපස්සයං අරහතො අදම්හ
අන්නඤ්ච පානඤ්ච පසන්නචිත්තා
සක්කච්ච දානං විපුලං අදම්හ
1073. තෙන මෙ තාදිසො වණ්ණො
තෙන මෙ ඉධමිජ්ඣති
උප්පජ්ජන්ති ච මෙ භොගා
යෙ කෙචි මනසො පියා
1074. අක්ඛාමි තෙ භික්ඛු මහානුභාව
මනුස්සභූතො යමකාසි පුඤ්ඤං
තෙනම්හි එවං ජලිතානුභාවො
වණ්ණො ච මෙ සබ්බදිසා පභාසතීති
පඨමඋපස්සයදායකවිමානං.