193. චණ්ඩාලී වන්ද පාදානි ගොතමස්ස යසස්සිනො,
තවෙව අනුකම්පාය අට්ඨාසි ඉසිසත්තමො

194. අභිප්පසාදෙහි මනං අරහත්තම්හි තාදිනී,
ඛිප්පං පඤ්ජලිකා වන්ද පරිත්තං තව ජීවිතන්ති

195. චොදිතා භාවිතත්තෙන සරීරන්තිමධාරිනා,
චණ්ඩාලී වන්දි පාදානි ගොතමස්ස යසස්සිනො

196. තමෙනමවධී ගාවී චණ්ඩාලිං පඤ්ජලිං ඨිතං,
නමස්සමානං සම්බුද්ධං අන්ධකාරෙ පභඞ්කරන්ති

197. ඛීණාසවං විගතරජං අනෙජං
එකං අරඤ්ඤම්හි රහො නිසින්නං
දෙවිද්ධිපත්තා උපසඞ්කමිත්වා
වන්දාමි තං වීර මහානුභාවාති

198. සුවණ්ණවණ්ණා ජලිතා මහායසා
විමානමොරුය්හ අනෙකචිත්තා
පරිවාරිතා අච්ඡරානං ගණෙන
කා ත්වං සුභෙ දෙවතෙ වන්දසෙ මමන්ති.

199. අහං භදන්තෙ චණ්ඩාලී තයා වීරෙන පෙසිතා,
වන්දිං අරහතො පාදෙ ගොතමස්ස යසස්සිනො

200. සාහං වන්දිත්ව පාදානි චුතා චණ්ඩාලයොනියා,
විමානං සබ්බතො භද්දං උපපන්නම්භි නන්දනං

201. අච්ඡරානං සතසහස්සං පුරක්ඛත්වාන තිට්ඨති,
තාසාහං පවරා සෙට්ඨා වණ්ණෙන යස්සා යුතා.

202. පහූතකතකල්යාණා සම්පජානා පතිස්සතා,
මුනිං කාරුණිකං ලොකෙ තං භන්තෙ වන්දිතුමාගතාති.

203. ඉදං වත්වාන චණ්ඩාලී කතඤ්ඤූ කතවෙදිනී,
වන්දිත්වා අරහතො පාදෙ තත්ථෙවන්තරධායථාති.

204. නීලා පීතා ච කාළා ච මඤ්ජෙට්ඨා අථ ලොහිතා,
උච්චාවචානං වණ්ණානං කිඤ්ජක්ඛපරිවාරිතා.

205. මන්දාරවානං පුප්ඵානං මාලං ධාරෙසි මුද්ධනි,
නයිමෙ අඤ්ඤෙසු කායෙසු රුක්ඛා සන්ති සුමෙධසෙ.

206. කෙන කායං උපපන්නා තාවතිංසං යසස්සිනී,
දෙවතෙ පුච්ඡිතාචික්ඛ කිස්ස කම්මස්සිදං ඵල’න්ති

207. භද්දිත්ථිති මං අඤ්ඤිංසු කිම්බිලායං උපාසිකා,
සද්ධා සීලෙන සම්පන්නා සංවිභාගරතා සදා.

208. අච්ඡාදනඤ්ච භත්තඤ්ච සෙනාසනං පදීපියං,
අදාසිං උජුභූතෙසු විප්පසන්නෙන චෙතසා

209. චාතුද්දසිං පඤ්චදසිං යා ච පක්ඛස්ස අට්ඨමී,
පාටිහාරියපක්ඛඤ්ච අට්ඨඞ්ගසුසමාගතං.

210. උපොසථං උපවසිස්සං සදා සීලෙසු සංවුතා,
සඤ්ඤමා සංවිභාගා ච විමානං ආවසාමහං.