2. 2.
171. අභික්කන්තෙන වණ්ණෙන යා ත්වං තිට්ඨසි දෙවතෙ,
ඔභාසෙන්ති දිසා සබ්බා ඔසධී විය තාරාකා.
172. කෙන තෙ තාදිසො වණ්ණො කෙන තෙ ඉධමිජ්ඣති,
උප්පජ්ජන්ති ච තෙ භොගා යෙ කෙචි මනසො පියා.
173. පුච්ඡාමි තං දෙවි මහානුභාවෙ
මනුස්සභූතා කිමකාසි පුඤ්ඤං
කෙනාසි එවං ජලිතානුභාවා
වණ්ණො ච තෙ සබ්බදිසා පභාසතීති.
174. සා දෙවතා අත්තමනා මොග්ගල්ලානෙන පුච්ඡිතා,
පඤ්හං පුට්ඨා වියාකාසි යස්ස කම්මස්සිදං ඵලං.
175. කෙවට්ටද්වාරා නික්ඛම්ම අහු මය්හං නිවෙසනං,
තත්ථ සඤ්චරමානානං සාවකානං මහෙසිනං.
176. ඔදනං කුම්මාසං සාකං ලොණසොවීරකඤ්චහං,
අදාසිං උජුභූතෙසු විප්පසන්නෙන චෙතසා.
177. චාතුද්දසිං පඤ්චදසිං යා ච පක්ඛස්ස අට්ඨමී,
පාටිහාරියපක්ඛඤ්ච අට්ඨඞ්ගසුසමාගතං
178. උපොසථං උපවසිස්සං සදා සීලෙසු සංවුතා,
සඤ්ඤමා සංවිභාගා ච විමානං ආවසාමහං
179. පාණාතිපාතා විරතා මුසාවාදා ච සඤ්ඤතා,
ථෙය්යා ච අතිචාරා ච මජ්ජපානා ච ආරකා
180. පඤ්චසික්ඛාපදෙ රතා අරියසච්චාන කොවිදා,
උපාසිකා චක්ඛුමතො ගොතමස්ස යසස්සිනො
181. තෙන මෙ තාදිසො වණ්ණො තෙන මෙ ඉධමිජ්ඣති,
උප්පජ්ජන්ති ච මෙ භොගා යෙ කෙචි මනසො පියා.
182. අක්ඛාමි තෙ භික්ඛු මහානුභාව
මනුස්සභූතා යමහං අකාසිං
තෙනම්හි එවං ජලිතානුභාවා
වණ්ණො ච මෙ සබ්බදිසා පභාසතීති.
මම ච භන්තෙ වචනෙන භගවතො පාදෙ සිරසා වන්දෙය්යාසි, ලඛුමා නාම භන්තෙ උපාසිකා භගවතො පාදෙ සිරසා වන්දතීති. අනච්ඡරියං ඛො පනෙතං භන්තෙ යං මං භගවා අඤ්ඤතරස්මිං සාමඤ්ඤඵලෙ ව්යාකරෙය්ය තං භගවා සකදාගාමිඵලෙ ව්යාකාසීති.
ලඛුමාවිමානං.
2. 3.
183. පිණ්ඩාය තෙ චරන්තස්ස තුණ්හීභූතස්ස තිට්ඨතො,
දළිද්දා කපණා නාරී පරාගාරං අවස්සිතා
184. යා තෙ අදාසි ආචාමං පසන්නා සෙහි පාණිහි,
සා හිත්වා මානුසං දෙහං කන්නු සා දිසතං ගතා
185. පිණ්ඩාය මෙ චරන්තස්ස තුණ්හීභූතස්ස තිට්ඨතො,
දළිද්දා කපණා නාරී පරාගාරං අවස්සිතා
186. යා මෙ අදාසි ආචාමං පසන්නා සෙහි පාණිහි,
සා හිත්වා මානුසං දෙහං විප්පමුත්තා ඉතො චුතා
187. නිම්මාණරතිනො නාම සන්ති දෙවා මහිද්ධිකා,
තත්ථ සා සුඛිතා නාරී මොදතාචාමදායිකාති
188. අභො දානං වරාකියා කස්සපෙ සුපතිට්ඨිතං,
පරාභතෙන දානෙන ඉජ්ඣිත්ථ වත දක්ඛිණා
189. යා මහෙසිත්තං කාරෙය්ය චක්කවත්තිස්ස රාජිනො
නාරී සබ්බඞ්ගකල්යාණී භත්තු චානොමදස්සිකා
එතස්සාචාමදානස්ස කලං නාග්ඝති සොළසිං.