23. පීඨං තෙ වෙළුරියමයං උළාරං
මනොජවං ගච්ඡති යෙන කාමං,
අලඞ්කතෙ මාල්යධරෙ සුවත්ථෙ
ඔභාසසි විජ්ජුරිවබ්භකූටං.

24. කෙන තෙ තාදිසො වණ්ණො කෙන තෙ ඉධමිජ්ඣති,
උප්පජ්ජන්ති ච තෙ භොගා යෙ කෙචි මනසො පියා.

25. පුච්ඡාමි තං දෙවි මහානුභාවෙ
මනුස්සභූතා කිමකාසි පුඤ්ඤං,
කෙනාසි එවං ජලිතානුභාවා
වණ්ණො ච තෙ සබ්බදිසා පභාසතීති.

26. සා දෙවතා අත්තමනා මොග්ගල්ලානෙන පුච්ඡිතා,
පඤ්හං පුට්ඨා වියාකාසි යස්ස කම්මස්සිදං ඵලං.

27. අප්පස්ස කම්මස්ස ඵලං මමෙදං
යෙනම්හි එවං ජලිතානුභාවා
අයං මනුස්සෙසු මනුස්සභූතා
පුරිමාය ජාතියා මනුස්සලොකෙ.

28. අද්දසං විරජං භික්ඛුං විප්පසන්නමනාවිලං,
තස්ස අදාසහං පීඨං පසන්නා සෙහි පාණිහි.

29. තෙන මෙ තාදිසො වණ්ණො තෙන මෙ ඉධමිජ්ඣති,
උප්පජ්ජන්ති ච මෙ භොගා යෙ කෙචි මනසො පියා.

30. අක්ඛාමි තෙ භික්ඛු මහානුභාව
මනුස්සභූතා යමකාසි පුඤ්ඤං,
තෙනම්හි එවං ජලිතානුභාවා
වණ්ණො ච මෙ සබ්බදිසා පභාසතීති.

31. කුඤ්ජරො තෙ වරාරොහො නානා රතනකප්පනො,
රුචිරො ථාමවා ජවසම්පන්නො ආකාසම්හි සමීහති.

32. පදුමී පදුමපත්තක්ඛී පදුමුප්පලජුතින්ධරො,
පදුම චුණ්ණාභිකිණ්ණඞ්ගො සොණ්ණපොක්ඛරමාලවා

33. පදුමානුසටං මග්ගං පදුමපත්තවිභූසිතං,
ඨීතං වග්ගුමනුග්ඝාති මිතං ගච්ඡති වාරණො

34. තස්ස පක්කමමානස්ස සොණ්ණකංසා රතිස්සරා,
තෙසං සූය්යති නිග්ඝොසො තුරියෙ පඤ්චඞ්ගිකෙ යථා

35. තස්ස නාගස්ස ඛන්ධස්මිං සුචිවත්ථා අලඞ්කතා,
මහන්තං අච්ඡරාසඞ්ඝං වණ්ණෙන අතිරොචසි

36. දානස්ස තෙ ඉදං ඵලං අථො සීලස්ස වා පන,
අථො අඤ්ජලිකම්මස්ස තං මෙ අක්ඛාහි පුච්ඡිතාති.

37. සා දෙවතා අත්තමනා මොග්ගල්ලානෙන පුච්ඡිතා,
පඤ්හං පුට්ඨා වියාකාසි යස්ස කම්මස්සිදං ඵලන්ති.

38. දිස්වාන ගුණසම්පන්නං ඣායිං ඣානරතං සතං,
අදාසිං පුප්ඵාභිකිණ්ණං ආසනං දුස්සසන්ථතං.

39. උපඩ්ඪපදුමමාලාහං ආසනස්ස සමන්තතො,
අබ්භොකිරිස්සං පත්තෙහි පසන්නා සෙහි පාණීහි.