6. 2.
133. පුත්තසොකෙනහං අට්ටා ඛිත්තචිත්තා විසඤ්ඤිනී,
නග්ගා පකිණ්ණකෙසි ච තෙන තෙන විචාරිහං.
134. වසිං සඞ්කාරකූටෙසු සුසානෙ රථියාසු ච
අචරිං තීණි වස්සානි ඛුප්පිපාසා සමප්පිතා.
135. අථද්දසාසිං සුගතං නගරං මිථිලං පති,
අදන්තානං දමෙතාරං සම්බුද්ධමකුතොභයං.
136. සචිත්තං පටිලද්ධාන වන්දිත්වාන උපාවිසිං
සො මෙ ධම්මමදෙසෙසි අනුකම්පාය ගොතමො.
137. තස්ස ධම්මං සුණිත්වාන පබ්බජිං අනගාරියං
යුඤ්ජන්තී සත්ථු වචනෙ සච්ඡාකාසිං පදං සිවං.
138. සබ්බෙ සොකා සමුච්ඡින්නා පහීනා එතදන්තීකා
පරිඤ්ඤාතා හි මෙ වත්ථු යතො සොකානසම්භවො.
ඉත්ථං සුදං වාසෙට්ඨි ථෙරී ගාථායො අභාසීති.
වාසෙට්ඨිථෙරිගාථා.
6. 3.
139. දහරා ත්වං රූපවතී අහම්පි දහරො යුවා,
පඤ්චඞ්ගිකෙන තුරුයෙන එහි ඛෙමෙ රමාමසෙ.
140. ඉමිනා පූතිකායෙන ආතුරෙන පභඞ්ගුනා
අට්ටියාමි හරායාමි කාමතණ්හා සමූහතා.
141. සත්තිසූලූපමාකාමා ඛන්ධාසං අධිකුට්ටනා
යං ත්වං කාමරතිං බ්රූසි අරති දානි සා මම.
142. සබ්බත්ථ විහතා නන්දි තමොක්ඛන්ධො පදාලිතො
එවං ජානාහි පාපිම නිහතො ත්වමසි අන්තක.
143. නක්ඛත්තානි නමස්සන්තා අග්ගිං පරිචරං වනෙ
යථාභුච්චං අජානන්තා බාලා සුද්ධිං අමඤ්ඤථ.
144. අහඤ්ච ඛො නමස්සන්තී සම්බුද්ධං පුරිසුත්තමං
පරිමුත්තා සබ්බදුක්ඛෙහි සත්ථුසාසනකාරිකාති.
ඉත්ථං සුදං ඛෙමා ථෙරී ගාථායො අභාසීති.
ඛෙමාථෙරීගාථා.
6. 4.
145. අලඞ්කතා සුවසනා මාලිනී චන්දනුක්ඛිතා
සබ්බාභරණසඤ්ඡන්නා දාසීගණපුරක්ඛතා.
146. අන්නං පානඤ්ච ආදාය ඛජ්ජභොජ්ජමනප්පකං
ගෙහතො නික්ඛමිත්වාන උය්යානමභිහාරයිං.
147. තත්ථ රමිත්වා කීළිත්වා ආගච්ඡන්ති සකං ඝරං
විහාරං දට්ඨුං පවිසිං සාකෙතෙ අඤ්ජනං වනං.
148. දිස්වාන ලොකපජ්ජොතං වන්දිත්වාන උපාවිසිං.
සෙ මෙ ධම්මමදෙසෙසි අනුකම්පාය චක්ඛුමා.
149. සුත්වා ච ඛො මහෙසිස්ස සච්චං අප්පටිවිජ්ඣහං
තත්ථෙව විරජං ධම්මං ඵුස්සයිං අමතං පදං.
150. තතො විඤ්ඤාත සද්ධම්මා පබ්බජිං අනගාරියං
තිස්සො විජ්ජා අනුප්පත්තා අමොඝං බුද්ධසාසනං.
ඉත්ථං සුදං සුජාතා ථෙරී ගාථායො අභාසීති.
සුජාතාථෙරීගාථා.