102. දස පුත්තෙ විජායිත්වා අස්මිං රූපසමුස්සයෙ
තතොහං දුබ්බලා ජිණ්ණා භික්ඛුනිං උපසඞ්කමිං.

103. සා මෙ ධම්මමදෙසෙසි ඛන්ධායතනධාතුයො
තස්සා ධම්මං සුණිත්වාන කෙසෙ ඡෙත්වාන පබ්බජිං.

104. තස්සා මෙ සික්ඛමානාය දිබ්බචක්ඛු විසොධිතං,
පුබ්බෙනිවාසං ජානාමි යත්ථ මෙ වුසිතං පුරෙ.

105. අනිමිත්තඤ්ච භාවෙමි එකග්ගා සුසමාහිතා,
අනන්තරා විමොක්ඛාසිං අනුපාදාය නිබ්බුතා.

106. පඤ්චක්ඛන්ධා පරිඤ්ඤාතා තිට්ඨන්ති ඡින්නමූලකා,
ධී තවත්ථු ජරෙ ඡම්මෙ නත්ථි දානි පුනබ්භවොති.

107. ලුනකෙසි පඞ්කධරී වකසාටී පුරෙ චරිං,
අවජ්ජෙ වජ්ජමතිනී වජ්ජෙ චාවජ්ජදස්සිනී.

108. දිවාවිහාරා නික්ඛම්ම ගිජ්ඣකූටම්හි පබ්බතෙ
අද්දසං විරජං බුද්ධං භික්ඛුසඞ්ඝපුරක්ඛතං.

109. නිහච්ච ජාණුං වන්දිත්වා සම්මුඛා පඤ්ජලිං අකං,
එහි භද්දෙති මං අවච සා මෙ ආසූපසම්පදා.

110. චිණ්ණා අඞ්ගා ච මගධා වජ්ජී කාසී ච කොසලා,
අනණා පණ්ණාසවස්සානි රට්ඨපිණ්ඩමභුඤ්ජිහං.

111. පුඤ්ඤං වත පසවී බහුං සප්පඤ්ඤො වතායං උපාසකො,
යො භද්දාය චීවරං අදාසි විප්පමුත්තාය සබ්බගන්ථෙහීති.

112. නඞ්ගලෙහි කසං ඛෙත්තං බීජානි පවපං ඡමා,
පුත්තදාරානි පොසෙන්තා ධනං වින්දන්ති මානවා.

113. කිමහං සීලසම්පන්නා සත්ථුසාසනකාරිකා,
නිබ්බානං නාධිගච්ඡාමි අකුසිතා අනුද්ධතා.

114. පදෙ පක්ඛාලයිත්වාන උදකෙසු කරොමහං,
පදොදකඤ්ච දිස්වාන ථලතො නින්නමාගතං.

115. තතො චිත්තං සමාධෙසිං අස්සං භද්දං’වජානියං,
තතො දීපං ගහෙත්වාන විහාරං පාවිසිං අහං.

116. සෙය්යං ඔලොකයිත්වාන මඤ්චකම්හි උපාවිසිං,
තතො සූචිං ගහෙත්වාන වට්ටිං ඔකස්සයාමහං
පදීපස්සෙව නිබ්බානං විමොක්ඛො අහු චෙතසොති.