5. 5.
87. අග්ගිං චන්දඤ්ච සුරියඤ්ච දෙවතා ච නමස්සිහං
නදීතිත්ථානි ගන්ත්වාන උදකං ඔරුහාමිහං.
නදීතිත්ථානි ගන්ත්වාන උදකං ඔරුහාමිහං.
88. බහුවතසමාදානා අඩ්ඪං සීසස්ස ඔලිඛිං,
ඡමාය සෙය්යං කප්පෙමි රත්තිං භත්තං න භුඤ්ජිහං
ඡමාය සෙය්යං කප්පෙමි රත්තිං භත්තං න භුඤ්ජිහං
89. විභූසාමණ්ඩනරතා නහාපනුච්ඡාසනෙහි ච
උපාකාසිං ඉමං කායං කාමරාගෙන අට්ටිතා.
උපාකාසිං ඉමං කායං කාමරාගෙන අට්ටිතා.
90. තතො සද්ධං ලභිත්වාන පබ්බජිං අනගාරියං,
දිස්වා කායං යථාභූතං කාමරාගො සමූහතො.
දිස්වා කායං යථාභූතං කාමරාගො සමූහතො.
91. සබ්බෙ භවා සමුච්ඡින්නා ඉච්ඡා ච පත්ථනාපි ච,
සබ්බයොගවිසංයුත්තා සන්තිං පාපුණි චෙතසොති.
සබ්බයොගවිසංයුත්තා සන්තිං පාපුණි චෙතසොති.
ඉත්ථං සුදං නන්දුත්තරා ථෙරී ගාථායො අභාසිත්ථා’ති.
නන්දුත්තරාථෙරීගාථා.
5. 6.
92. සද්ධාය පබ්බජිත්වාන අගාරස්මානගාරියං
විචරිහං තෙන තෙන ලාභසක්කාර උස්සුකා.
විචරිහං තෙන තෙන ලාභසක්කාර උස්සුකා.
93. රිඤ්චිත්වා පරමං අත්ථං හීනං අත්ථමසෙවිහං
කිලෙසානං වසං ගන්ත්වා සාමඤ්ඤත්ථං න බුජ්ඣිහං.
කිලෙසානං වසං ගන්ත්වා සාමඤ්ඤත්ථං න බුජ්ඣිහං.
94. තස්සා මෙ අහු සංවෙගො නිසින්නාය විහාරකෙ
උම්මග්ගපටිපන්නම්හි තණ්හාය වසමාගතා.
උම්මග්ගපටිපන්නම්හි තණ්හාය වසමාගතා.
95. අප්පකං ජීවිතං මය්හං ජරා ව්යාධි ච මද්දති,
ජරාය භිජ්ජතෙ කායො න මෙ කාලො පමජ්ජිතුං.
ජරාය භිජ්ජතෙ කායො න මෙ කාලො පමජ්ජිතුං.
96. යථාභූතං අවෙක්ඛන්තී ඛන්ධානං උදයබ්බයං,
විමුත්තචිත්තා උට්ඨාසිං කතං බුද්ධස්ස සාසනන්ති.
විමුත්තචිත්තා උට්ඨාසිං කතං බුද්ධස්ස සාසනන්ති.
ඉත්ථං සුදං මිත්තා කාළී ථෙරී ගාථායො අභාසිත්ථා’ති.
මිත්තාකාළිථෙරීගාථා.
5. 7.
97. අගාරස්මිං වසන්තීහං ධම්මං සුත්වාන භික්ඛුනො,
අද්දසං විරජං ධම්මං නිබ්බානං පදමච්චුතං.
අද්දසං විරජං ධම්මං නිබ්බානං පදමච්චුතං.
98. සාහං පුත්තං ධීතරඤ්ච ධනධඤ්ඤඤ්ච ඡඩ්ඩිය
කෙසෙ ඡෙදාපයිත්වාන පබ්බජිං අනගාරියං.
කෙසෙ ඡෙදාපයිත්වාන පබ්බජිං අනගාරියං.
99. සික්ඛමානා අහං සන්තී භාවෙන්තී මග්ගමඤ්ජසං,
පහාසිං රාගදොසඤ්ච තදෙකට්ඨෙ ච ආසවෙ.
පහාසිං රාගදොසඤ්ච තදෙකට්ඨෙ ච ආසවෙ.
100. භික්ඛුනී උපසම්පජ්ජ පුබ්බෙ ජාතිමනුස්සරිං
විසොධිතං දිබ්බචක්ඛුං විමලං සාධුභාවිතං.
විසොධිතං දිබ්බචක්ඛුං විමලං සාධුභාවිතං.
101. සඞ්ඛාරෙ පරතො දිස්වා හෙතුජාතෙ පලොකිතෙ
පහාසිං ආසවෙ සබ්බෙ සීතිභූතාම්හි නිබ්බුතාති.
පහාසිං ආසවෙ සබ්බෙ සීතිභූතාම්හි නිබ්බුතාති.
ඉත්ථං සුදං සකුලා ථෙරී ගාථායො අභාසිත්ථාති.
සකුලාථෙරීගාථා.
5. 8.
102. දස පුත්තෙ විජායිත්වා අස්මිං රූපසමුස්සයෙ
තතොහං දුබ්බලා ජිණ්ණා භික්ඛුනිං උපසඞ්කමිං.
තතොහං දුබ්බලා ජිණ්ණා භික්ඛුනිං උපසඞ්කමිං.
103. සා මෙ ධම්මමදෙසෙසි ඛන්ධායතනධාතුයො
තස්සා ධම්මං සුණිත්වාන කෙසෙ ඡෙත්වාන පබ්බජිං.
තස්සා ධම්මං සුණිත්වාන කෙසෙ ඡෙත්වාන පබ්බජිං.
104. තස්සා මෙ සික්ඛමානාය දිබ්බචක්ඛු විසොධිතං,
පුබ්බෙනිවාසං ජානාමි යත්ථ මෙ වුසිතං පුරෙ.
පුබ්බෙනිවාසං ජානාමි යත්ථ මෙ වුසිතං පුරෙ.
105. අනිමිත්තඤ්ච භාවෙමි එකග්ගා සුසමාහිතා,
අනන්තරා විමොක්ඛාසිං අනුපාදාය නිබ්බුතා.
අනන්තරා විමොක්ඛාසිං අනුපාදාය නිබ්බුතා.
106. පඤ්චක්ඛන්ධා පරිඤ්ඤාතා තිට්ඨන්ති ඡින්නමූලකා,
ධී තවත්ථු ජරෙ ඡම්මෙ නත්ථි දානි පුනබ්භවොති.
ධී තවත්ථු ජරෙ ඡම්මෙ නත්ථි දානි පුනබ්භවොති.
ඉත්ථං සුදං සොණා ථෙරී ගාථායො අභාසිත්ථාති.
සොණථෙරීගාථා.