5. 10.
112. නඞ්ගලෙහි කසං ඛෙත්තං බීජානි පවපං ඡමා,
පුත්තදාරානි පොසෙන්තා ධනං වින්දන්ති මානවා.
පුත්තදාරානි පොසෙන්තා ධනං වින්දන්ති මානවා.
113. කිමහං සීලසම්පන්නා සත්ථුසාසනකාරිකා,
නිබ්බානං නාධිගච්ඡාමි අකුසිතා අනුද්ධතා.
නිබ්බානං නාධිගච්ඡාමි අකුසිතා අනුද්ධතා.
114. පදෙ පක්ඛාලයිත්වාන උදකෙසු කරොමහං,
පදොදකඤ්ච දිස්වාන ථලතො නින්නමාගතං.
පදොදකඤ්ච දිස්වාන ථලතො නින්නමාගතං.
115. තතො චිත්තං සමාධෙසිං අස්සං භද්දං’වජානියං,
තතො දීපං ගහෙත්වාන විහාරං පාවිසිං අහං.
තතො දීපං ගහෙත්වාන විහාරං පාවිසිං අහං.
116. සෙය්යං ඔලොකයිත්වාන මඤ්චකම්හි උපාවිසිං,
තතො සූචිං ගහෙත්වාන වට්ටිං ඔකස්සයාමහං
පදීපස්සෙව නිබ්බානං විමොක්ඛො අහු චෙතසොති.
තතො සූචිං ගහෙත්වාන වට්ටිං ඔකස්සයාමහං
පදීපස්සෙව නිබ්බානං විමොක්ඛො අහු චෙතසොති.
ඉත්ථං සුදං පටාචාරා ථෙරී ගාථායො අභාසිත්ථාති.
පටාචාරාථෙරීගාථා.
5. 11.
117. මූසලානි ගහෙත්වාන ධඤ්ඤං කොට්ටෙන්ති මානවා
පුත්තදාරානි පොසෙන්තා ධනං වින්දන්ති මානවා:
පුත්තදාරානි පොසෙන්තා ධනං වින්දන්ති මානවා:
118. කරොථ බුද්ධසාසනං යං කත්වා නානුතප්පති,
ඛිප්පං පාදානි ධොවිත්වා එකමන්තෙ නිසීදථ,
චෙතොසමථමනුයුත්තා කරොථ බුද්ධසාසනං.
ඛිප්පං පාදානි ධොවිත්වා එකමන්තෙ නිසීදථ,
චෙතොසමථමනුයුත්තා කරොථ බුද්ධසාසනං.
119. තස්සා තා වචනං සුත්වා පටාචාරාය සාසනං,
පාදෙ පක්ඛාලයිත්වාන එකමන්තං උපාවිසුං,
චෙතොසමථමනුයුත්තා අකංසු බුද්ධසාසනං.
පාදෙ පක්ඛාලයිත්වාන එකමන්තං උපාවිසුං,
චෙතොසමථමනුයුත්තා අකංසු බුද්ධසාසනං.
120. රත්තියා පුරිමෙ යාමෙ පුබ්බජාතිං අනුස්සරුං,
රත්තියා මජ්ඣිමෙ යාමෙ දිබ්බචක්ඛුං විසොධයුං,
රත්තියා පච්ඡිමෙ යාමෙ තමොක්ඛන්ධං පදාලයුං.
රත්තියා මජ්ඣිමෙ යාමෙ දිබ්බචක්ඛුං විසොධයුං,
රත්තියා පච්ඡිමෙ යාමෙ තමොක්ඛන්ධං පදාලයුං.
121. උට්ඨාය පාදෙ වන්දිංසු කතා තෙ අනුසාසනී,
ඉන්දංව තිදසා දෙවා සඞ්ගාමෙ අපරාජිතං,
පුරක්ඛත්වා විහරියාම තෙවිජ්ජම්හ අනාසවාති.
ඉන්දංව තිදසා දෙවා සඞ්ගාමෙ අපරාජිතං,
පුරක්ඛත්වා විහරියාම තෙවිජ්ජම්හ අනාසවාති.
ඉත්ථං සුදං තිංසමත්තා ථෙරී භික්ඛුනියො ගාථායො අභාසිත්ථාති.
තිංසමත්තාථෙරී භික්ඛූනීගාථා.
5. 12.
122. දුග්ගතාහං පුරෙ ආසිං විධවා ච අපුත්තිකා,
විනා මිත්තෙහි ඤාතීහි භත්තචොළස්ස නාධිගං.
විනා මිත්තෙහි ඤාතීහි භත්තචොළස්ස නාධිගං.
123. පත්තං දණ්ඩඤ්ච ගණ්හිත්වා භික්ඛමානා කුලාකුලං,
සීතුණ්හෙන ච ඩය්හන්තී සත්තවස්සානි චාරිහං.
සීතුණ්හෙන ච ඩය්හන්තී සත්තවස්සානි චාරිහං.
124. භික්ඛුනිං පුන දිස්වාන අන්නපානස්ස ලාභිනිං,
උපසඞ්කම්මාවොචං පබ්බජ්ජං අනගාරියං.
උපසඞ්කම්මාවොචං පබ්බජ්ජං අනගාරියං.
125. සා ච මං අනුකම්පාය පබ්බාජෙසි පටාචාරා,
තතො මං ඔවදිත්වාන පරමත්ථෙ නියොජයී.
තතො මං ඔවදිත්වාන පරමත්ථෙ නියොජයී.
126. තස්සාහං වචනං සුත්වා අකාසිං අනුසාසනිං,
අමොඝොය්යාය ඔවාදො තෙවිජ්ජම්හි අනාසවාති.
අමොඝොය්යාය ඔවාදො තෙවිජ්ජම්හි අනාසවාති.
ඉත්ථං සුදං චන්දා ථෙරී ගාථායො අභාසිත්ථාති.
චන්දාථෙරීගාථා.
පඤ්චකනිපාතො නිට්ඨිතො.