447. මන්තාවතියා නගරෙ
රඤ්ඤො කොඤ්චස්ස අග්ගමහෙසියා,
ධීතා ආසි සුමෙධා
පසාදිතා සාසනකරෙහි.

448. සීලවතී චිත්තකථා
බහුස්සුතා බුද්ධසාසනෙ විනීතා,
මාතාපිතරො උපගම්ම
භණති උභයො නිසාමෙථ.

449. නිබ්බානාභිරතාහං
අසස්සතං භවගතං යදිපි දිබ්බං,
කිමඞ්ග පන තුච්ඡා කාමා
අප්පස්සාදා බහුවිඝාතා.

450. කාමා කටුකා ආසී-
විසූපමා යෙසු මුච්ඡිතා බාලා,
තෙ දීඝරත්තං නිරයෙ
සමප්පිතා හඤ්ඤන්තෙ දුක්ඛිතා.

451. සොචන්ති පාපකම්මා
විනිපාතෙ පාපබුද්ධිතො,
සදා කායෙන වාචාය
මනසා ච අසංවුතා.

452. බාලා තෙ දුප්පඤ්ඤා
අචෙතනා දුක්ඛසමුදයො රුද්ධා
දෙසෙන්තෙ අජානන්තා
න බුජ්ඣතෙ අරියසච්චානි.

453. සච්චානි අම්ම බුද්ධවර-
දෙසිතානි තෙ බහුතරා අජානන්තා,
යෙ අභිනන්දන්ති භවගතං
පිහෙන්ති දෙවෙසු උපපත්තිං.

454. දෙවෙසුපි උපපත්ති
අසස්සතා භවගතෙ අනිච්චම්හි,
න ච සන්තසන්ති බාලා
පුනප්පුනං ජායිතබ්බස්ස.

455. චත්තාරො විනිපාතා
ද්වෙ ච ගතියො කථඤ්චි ලබ්භන්ති
න ච විනිපාතගතානං
පබ්බජ්ජා අත්ථි නිරයෙසු.

456. අනුජානාථ මං උභයො
පබ්බජිතුං දසබලස්ස පාවචනෙ
අප්පොස්සුක්කා ඝටිස්සං
ජාතිමරණප්පහානාය.

457. කිං භවගතෙන අභිනන්දිතෙන
කායකලිනා අසාරෙන,
භවතණ්හාය නිරොධා
අනුජානාථ පබ්බජිස්සාමි.

458. බුද්ධානං උප්පාදො
විවජ්ජිතො අක්ඛණො ඛණො ලද්ධො,
සීලානි බ්රහ්මචරියං
යාවජීවං න දූසෙය්යං.

459. එවං භණති සුමෙධා
මාතාපිතරො න තාව ආහාරං,
ආහරියාමි ගහට්ඨා
මරණවසං ගතාව හෙස්සාමි.

460. මාතා දුක්ඛිතා රොදති
පිතා ච අස්සා සබ්බසො සමභිහතො,
ඝටෙන්ති සඤ්ඤාපෙතුං
පාසාදතලෙ ඡමාපතිතං.

461. උට්ඨෙහි පුත්තක කිං සොචිතෙන
දින්නාසි වාරණවතිම්හි
රාජා අණීකදත්තො
අභිරූපො තස්ස ත්වං දින්නා.

462. අග්ගමහෙසී භවිස්සසි
අණීකදත්තස්ස රාජිනො භරියා,
සීලානි බ්රහ්මචරියං
පබ්බජ්ජා දුක්කරා පුත්තක.

463. රජ්ජෙ ආණා ධනමිස්සරියං
භොගා සුඛා දහරිකාසි,
භුඤ්ජාහි කාමභොගෙ
වාරෙය්යං හොතු තෙ පුත්ත.

464. අථ නෙ භණති සුමෙධා
මා ඊදිසිකානං භවගතං අසාරං,
පබ්බජ්ජා වා හෙහිති,
මරණං වා මෙ නචෙව වාරෙය්යං.

465. කිමිව පූතිකායමසුචිං
සවනගන්ධං භයානකං කුණපං
අභිසංවිසෙය්යං භස්තං
අසකිං පග්ඝරණං අසුචිපුණ්ණං.