291. ලට්ඨිහත්ථො පුරෙ ආසී සො දානි මිගලුද්දකො,
ආසාය පලිපා ඝොරා නාසක්ඛි පාරමෙතවෙ.

292. සුමුත්තං මං මඤ්ඤමානා චාපා පුත්තමතොසයී,
චාපාය බන්ධනං ඡෙත්වා පබ්බජිස්සං පුනොපහං.

293. මා මෙ කුජ්ඣි මහාවීර මා මෙ කුජ්ඣි මහාමුනී,
න හි කොධපරෙතස්ස සුද්ධි අත්ථි කුතො තපො.

294. පක්කමිස්සං ච නාලාතො කොධ නාලාය වච්ඡති,
බන්ධන්තී ඉත්ථිරූපෙන සමණෙ ධම්මජීවිනො.

295. එහි කාළ නිවත්තස්සු භුඤ්ජකාමෙ යථා පුරෙ
අහඤ්ච තෙ වසී කතා යෙ ච මෙ සන්ති ඤාතකා.

296. එත්තො චාපි චතුබ්භාගං යථා භාසසි ත්වං ච මෙ
තයි රත්තස්ස පොසස්ස උළාරං වත තං සියා.

297. කාළඞ්ගිනිං ව තක්කාරිං පුප්ඵිතං ගිරිමුද්ධනී
ඵුල්ලං දාළිමයට්ඨිංව අන්තො දීපෙව පාටළිං.

298. හරිචන්දනලිත්තඞ්ගිං කාසිකුත්තමධාරිණිං
තං මං රූපවතිං සන්තිං කස්ස ඔහාය ගච්ඡසි.

299. සාකුන්තිකොව සකුණිං යථා බන්ධිතුමිච්ඡති,
ආහරිමෙන රූපෙන න මං ත්වං බාධයිස්සසි.

300. ඉමං ච මෙ පුත්තඵලං කාළ උප්පාදිතං තයා,
තං මං පුත්තවතිං සන්තිං කස්ස ඔහාය ගච්ඡසි.

301. ජහන්ති පුත්තෙ සප්පඤ්ඤා තතො ඤාතී තතො ධනං,
පබ්බජන්ති මහාවීරා නාගො ඡෙත්වාව බන්ධනං.

302. ඉදානි තෙ ඉමං පුත්තං දණ්ඩෙන ඡුරිකාය වා,
භූමියං වා නිසුම්භෙය්යං පුත්තසොකා න ගච්ඡසි.

303. සචෙ පුත්තං සිගාලානං කුක්කුරානං පදාහිසි,
න මං පුත්තකතෙ ජම්මී, පුනරාවත්තයිස්සසි.

304. හන්ද ඛො දානි භද්දන්තෙ කුහිං කාළ ගමිස්සසි,
කතමං ගාමං නිගමං නගරං රාජධානියො.

305. අහුම්හ පුබ්බෙ ගණිනො අස්සමණා සමණමානිනො,
ගාමෙන ගාමං විචරිම්හ නගරෙ රාජධානියො.

306. එසො හි භගවා බුද්ධො නදිං නෙරඤ්ජරං පති,
සබ්බදුක්ඛප්පහානාය ධම්මං දෙසෙති පාණිනං
තස්සාහං සන්තිකෙ ගච්ඡං සො මෙ සත්ථා භවිස්සති.

307. වන්දනං දානි වජ්ජාසි ලොකනාථං අනුත්තරං
පදක්ඛිණං ච කත්වාන ආදිසෙය්යාසි දක්ඛිණං.

308. එතං ඛො ලබ්භමම්හෙහි යථා භාසසි ත්වං ච මෙ
වන්දනං දානි තෙ වජ්ජං ලොකනාථං අනුත්තරං,
පදක්ඛිණං ච කත්වාන ආදිසිස්සාමි දක්ඛිණං.