399. මනුජස්ස පමත්තචාරිනො තණ්හා වඩ්ඪති මාලුවා විය,
සො පලවති හුරා හුරං ඵලමිච්ඡං ව වනස්මිං වානරො.

400. යං එසා සහතෙ ජම්මි තණ්හා ලොකෙ විසත්තිකා,
සොකා තස්ස පවඩ්ඪන්ති අභිවට්ඨං ව බීරණං.

401. යො චෙතං සහතෙ ජම්මිං තණ්හං ලොකෙ දුරච්චයං,
සොකා තම්හා පපතන්ති උදබින්දුව පොක්ඛරා.

402. තං වො වදාමි භද්දං වො යාවන්තෙත්ථ සමාගතා,
තණ්හාය මූලං ඛණථ උසීරත්ථෙව බීරණං,
මා වො නළං ව සොතො ව මාරො භඤ්ජි පුනප්පුනං.

403. කරොථ බුද්ධවචනං ඛණො වො මා උපච්චගා,
ඛණාතීතා හි සොචන්ති නිරයම්හි සමප්පිතා.

404. පමාදො රජො සබ්බදා පමාදානුපතිතො රජො,
අප්පමාදෙන විජ්ජාය අබ්බහෙ සල්ලමත්තනො’ති.

405. පණ්ණවීසති වස්සානි යතො පබ්බජිතො අහං,
අච්ඡරාසඞ්ඝාතමත්තම්පි චෙතොසන්තිමනජ්ඣගං.

406. අලද්ධා චිත්තස්සෙකග්ගං කාමරාගෙන අද්දිතො,
බාහා පග්ගය්හ කන්දන්තො විහාරා උපනික්ඛමිං.

407. සත්ථං වා ආහරිස්සාමි කො අත්ථො ජීවිතෙන මෙ,
කථං හි සික්ඛං පච්චක්ඛං කාලං කුබ්බෙථ මාදිසො.

408. තදාහං ඛුරමාදාය මඤ්චකම්හි උපාවිසිං,
පරිනීතො ඛුරො ආසි ධමනිං ඡෙත්තුමත්තනො.

409. තතො මෙ මනසිකාරො යොනිසො උදපජ්ජථ,
ආදීනවො පාතුරහු නිබ්බිදා සමතිට්ඨථ.

410. තතො චිත්තං විමුච්චි මෙ පස්ස ධම්මසුධම්මතං,
තිස්සො විජ්ජා අනුප්පත්තා කතං බුද්ධස්ස සාසන’න්ති.

411. උට්ඨෙහි නිසීදි කාතියාන
මා නිද්දාබහුලො අහු ජාගරස්සු,
මා තං අලසං පමත්තබන්ධු
කූටෙනෙව ජිනාතු මච්චුරාජා.

412. සයථාපි මහාසමුද්දවෙගො
එවං ජාතිජරාතිවත්තතෙ තං,
සො කරොහි සුදීපමත්තනා ත්වං
න හි තාණං තව විජ්ජතෙව අඤ්ඤං.

413. සත්ථා හි විජෙසි මග්ගමෙතං
සඞ්ගා ජාතිජරාභයා අතීතං,
පුබ්බාපරරත්තමප්පමත්තො
අනුයුඤ්ජස්සු දළ්හං කරොහි යොගං.

414. පුරිමානි පමුඤ්ච බන්ධනානි
සඞ්ඝාටි ඛුරමුණ්ඩභික්ඛභොජී,
මා ඛිඩ්ඩාරතිඤ්ච නිද්දං
අනුයුඤ්ජිත්ථ ඣාය කාතියාන.

415. ඣායාහි ජිනාහි කාතියාන
යොගක්ඛෙමපථෙසු කොවිදොසි,
පප්පුය්ය අනුත්තරං විසුද්ධං
පරිනිබ්බාහිසි වාරිනාව ජොති.

416. පජ්ජොතිකරො පරිත්තරංසො
වාතෙන විනම්යතෙ ලතාව,
එවම්පි තුවං අනාදියානො
මාරං ඉන්දසගොත්ත නිද්ධුනාහි,
සො වෙදයිතාසු වීතරාසො
කාලං කඞ්ඛ ඉධෙව සීතිභූතො’ති.

417. සුදෙසිතො චක්ඛුමතා බුද්ධෙනාදිච්චබන්ධුනා,
සබ්බසංයොජනාතීතො සබ්බවට්ටවිනාසනො.

418. නිය්යානිකො උත්තරණො තණ්හාමූලවිසොසනො,
විසමූලං ආඝාතනං ඡෙත්වා පාපෙති නිබ්බුතිං.

419. අඤ්ඤණමූලභෙදාය කම්මයන්තවිඝාටනො,
විඤ්ඤාණානං පරිග්ගහෙ ඤාණවජීරනිපාතිනො.