453. දිපාදකොයං අසුචි දුග්ගන්ධො පරිහීරති,
නානාකුණපපරිපූරො විස්සවන්තො තතො තතො.

454. මිගං නිලීනං කූටෙන බළිසෙනෙව අම්බුජං,
වානරං විය ලෙපෙන බාධයන්ති පුථුජ්ජනං.

455. රූපා සද්දා රසා ගන්ධා ඵොට්ඨබ්බා ච මනොරමා,
පඤ්චකාමගුණා එතෙ ඉත්ථිරූපස්මිං දිස්සරෙ.

456. යෙ එතා උපසෙවන්ති රත්තචිත්තා පුථුජ්ජනා,
වඩ්ඪෙන්ති කටසිං ඝොරං අනචිනන්ති පුනබ්භවං.

457. යො චෙතා පරිවජ්ජෙති සප්පස්සෙව පදා සිරො,
සො’මං විසත්තිකං ලොකෙ සතො සමතිවත්තති.

458. කාමෙස්වාදීනවං දිස්වා නෙක්ඛම්මං දට්ඨු ඛෙමතො,
නිස්සටො සබ්බකාමෙහි පත්තො මෙ ආසවක්ඛයො’ති.

උරුවෙලකස්සපො ච ථෙරො තෙකිච්ඡකාරි ච
මහානාගො ච කුල්ලො ච මාලුඞ්ක්යො සප්පදාසකො,
කාතියානො මිගජාලො ජෙන්තො සුමනසව්හයො,
නහාතමුනි බ්රහ්මදත්තො සිරිමන්දො සබ්බකාමී ච
ගාථායො චතුරාසීති ථෙරා චෙත්ථ චතුද්දසා’ති.

459. අලඞ්කතා සුවසනා මාලභාරී විභූසිතා,
අලත්තකකතාපාදා පාදුකාරුය්හ වෙසිකා.

460. පාදුකා ඔරුහිත්වාන පුරතො පඤ්ජලීකතා,
සා මං සණ්හෙන මුදුනා මිහිතපුබ්බං අභාසථ.

461. යුවාසි ත්වං පබ්බජිතො තිට්ඨාහි මම සාසනෙ,
භුඤ්ජ මානුසකෙ කාමෙ අහං විත්තං දදාමි තෙ.

462. සච්චං තෙ පටිජානාමි අග්ගිං වා තෙ හරාමහං,
යදා ජිණ්ණා භවිස්සාම උභො දණ්ඩපරායනා,
උභො පි පබ්බජිස්සාම උභයත්ථ කටග්ගහො.

463. තං ච දිස්වාන යාචන්තිං වෙසිකං පඤ්ජලීකතං,
අලඞ්කතං සුවසනං මච්චුපාසං ව ඔඩ්ඩිතං.

464. තතො මෙ මනසිකාරො යොනිසො උදපජ්ජථ,
ආදීනවො පාතුරහු නිබ්බිදා සමතිට්ඨථ.

465. තතො චිත්තං විමුච්චි මෙ පස්ස ධම්මසුධම්මතං,
තිස්සො විජ්ජා අනුප්පත්තා කතං බුද්ධස්ස සාසන’න්ති.

466. පරෙ අම්බාටකාරාමෙ වනසණ්ඩම්හි භද්දියො,
සමූලං තණ්හමබ්බුය්හ තත්ථ භද්දො ඣියායති.

467. රමන්තෙකෙ මුතිඞ්ගෙහි වීණාහි පණවෙහි ච,
අහං ච රුක්ඛමූලස්මිං රතො බුද්ධස්ස සාසනෙ.

468. බුද්ධො චෙ මෙ වරං දජ්ජා සො ච ලබ්භෙථ මෙ වරො,
ගණ්හෙහං සබ්බලොකස්ස නිච්චං කායගතං සතිං.

469. යෙ මං රූපෙන පාමිංසු යෙ ච ඝොසෙන අන්වගූ,
ඡන්දරාගවසූපෙතා න මං ජානන්ති තෙ ජනා.