4. 1. 6.
287. ස්වාගතං වත මෙ ආසි ගයායං ගයාඵග්ගුයා,
යං අද්දසාසිං සම්බුද්ධං දෙසෙන්තං ධම්මමුත්තමං.
288. මහප්පභං ගණාචරියං අග්ගප්පත්තං විනායකං,
සදෙවකස්ස ලොකස්ස ජිනං අතුලදස්සනං.
289. මහානාගං මහාවීරං මහාජුතිමනාසවං,
සබ්බාසවපරික්ඛීණං සත්ථාරමකුතොභයං.
290. චිරසඞ්කිලිට්ඨං වත මං දිට්ඨිසන්දානසන්දිතං,
විමොචයී සො භගවා සබ්බගන්ථෙහි සෙනක’න්ති.
ඉත්ථං සුදං ආයස්මා සෙනකො ථෙරො ගාථායො අභාසිත්ථා’ති.
සෙනකත්ථෙරගාථා.
4. 1. 7.
291. යො දන්ධකාලෙ තරති තරණීයෙ ච දන්ධයෙ
අයොනි සංවිධානෙන බාලො දුක්ඛං නිගච්ඡති.
292. තස්සත්ථා පරිහායන්ති කාළපක්ඛෙව චන්දිමා
ආයසස්යඤ්ච පප්පොති මිත්තෙහි ච විරුජ්ඣති.
293. යො දන්ධකාලෙ දන්ධෙති තරණීයෙ ච තාරයෙ
යොනිසො සංවිධානෙන සුඛං පප්පොති පණ්ඩිතො.
294. තස්සත්ථා පරිපූරෙන්ති සුක්කපක්ඛෙව චන්දිමා
යසො කිත්තිඤ්ච පප්පොති මිත්තෙහි න විරුජ්ඣතී’ති.
ඉත්ථං සුදං ආයස්මා සම්භූතො ථෙරො ගාථායො අභාසිත්ථා’ති.
සම්භූතත්ථෙරගාථා.
4. 1. 8.
295. උභයෙනෙව සම්පන්නො රාහුලභද්දො’ති මං විදූ
යඤ්චම්හි පුත්තො බුද්ධස්ස යං ච ධම්මෙසු චක්ඛුමා.
296. යං ච ආසවා ඛීණා යං ච නත්ථි පුනබ්භවො
අරහා දක්ඛිණෙය්යොම්හි තෙවිජ්ජො අමතද්දසො.
297. කාමන්ධා ජාලපච්ඡන්නා තණ්හාඡදනඡාදිතා
පමත්තබන්ධුනා බද්ධා මච්ඡාව කුමිනාමුඛෙ.
298. තං කාමං අහමුජ්ඣිත්වා ඡෙත්වා මාරස්ස බන්ධනං
සමූලං තණ්හමබ්බුය්හ සීතිභූතොස්මි නිබ්බුතො’ති.
ඉත්ථං සුදං ආයස්මා රාහුලො ථෙරො ගාථායො අභාසිත්ථා’ති.
රාහුලත්ථෙරගාථා.
4. 1. 9.
299. ජාතරූපෙන පච්ඡන්නා දාසීගණපුරක්ඛතා
අඞ්කෙන පුත්තමාදාය භරියා මං උපාගමි.
300. තං ච දිස්වාන ආයන්තිං සකපුත්තස්ස මාතරං
අලඞ්කතං සුවසනං මච්චුපාසං’ව ඔඩ්ඩිතං.
301. තතො මෙ මනසිකාරො යොනිසො උදපජ්ජථ
ආදීනවො පාතුරහු නිබ්බිදා සමතිට්ඨථ.
302. තතො චිත්තං විමුච්චි මෙ පස්ස ධම්මසුධම්මතං
තිස්සො විජ්ජා අනුප්පත්තා කතං බුද්ධස්ස සාසනන්ති.
ඉත්ථං සුදං ආයස්මා චන්දනො ථෙරො ගාථායො අභාසිත්ථා’ති.
චන්දනත්ථෙරගාථා.