311. පබ්බජිං ජීවිකත්ථො’හං ලද්ධාන උපසම්පදං,
තතො සද්ධං පටිලභිං දළ්හවිරියො පරක්කමිං.

312. කාමං භිජ්ජතු’යං කායො මංසපෙසී විසීයරුං,
උභො ජණ්ණුකසන්ධීහි ජඞ්ඝායො පපතන්තු මෙ.

313. නාසිස්සං න පිවිස්සාමි විහාරා ච න නික්ඛමෙ,
න’පි පස්සං නිපාතෙස්සං තණ්හාසල්ලෙ අනූහතෙ.

314. තස්ස මෙවං විහරතො පස්ස විරියපරක්කමං,
තිස්සො විජ්ජා අනුප්පත්තා කතං බුද්ධස්ස සාසන’න්ති.

නාගසමාලො භගු ච සභියො නන්දකො’පි ච
ජම්බුකො සෙනකො ථෙරො සම්භූතො රාහුලො’පි ච
භවති චන්දනො ථෙරො දසෙතෙ බුද්ධසාවකා
ධම්මිකො සප්පකො ථෙරො මුදිතො චා’පි තෙ තයො
ගාථායො ද්වෙ ච පඤ්ඤාස ථෙරා සබ්බෙ’පි තෙරසා’ති.

315. භික්ඛු සීවථිකං ගන්ත්වා අද්දසං ඉත්ථිමුජ්ඣිතං,
අපවිද්ධං සුසානස්මිං ඛජ්ජන්තිං කිමිහී ඵුටං.

316. යං හි එකෙ ජිගුච්ඡන්ති මතං දිස්වාන පාපකං,
කාමරාගො පාතුරහු අන්ධො’ව වසතී අහුං.

317. ඔරං ඔදනපාකම්හා තම්හා ඨානා අපක්කමිං,
සතිමා සම්පජානොහං එකමන්තං උපාවිසිං.

318. තතො මෙ මනසිකාරො යොනිසො උදපජ්ජථ,
ආදීනවො පාතුරහු නිබ්බිදා සමතිට්ඨථ.

319. තතො චිත්තං විමුච්චි මෙ පස්ස ධම්මසුධම්මතං,
තිස්සො විජ්ජා අනුප්පත්තා කතං බුද්ධස්ස සාසන’න්ති.

320. අයොගෙ යුඤ්ජමත්තානං පුරිසො කිච්චමිච්ඡතො,
චරං චෙ නාධිගච්ඡෙය්ය තං මෙ දුබ්භගලක්ඛණං.

321. අබ්බූළ්හං අඝගතං විජිතං
එකං චෙ ඔස්සජෙය්ය කලීව සියා,
සබ්බානිපි චෙ ඔස්සජෙය්ය අන්ධොව සියා
සමවිසමස්ස අදස්සනතො.

322. යං හි කයිරා තං හි වදෙ යං න කයිරා න තං වදෙ,
අකරොන්තං භාසමානං පරිජානන්ති පණ්ඩිතා.

323. යථා’පි රුචිරං පුප්ඵං වණ්ණවන්තං අගන්ධකං,
එවං සුභාසිතා වාචා අඵලා හොති අකුබ්බතො.

324. යථා’පි රුචිරං පුප්ඵං වණ්ණවන්තං සගන්ධකං,
එවං සුභාසිතා වාචා සඵලා හොති පකුබ්බතො’ති.