246. අහු තුය්හං පුරෙ සද්ධා සා තෙ අජ්ජ න විජ්ජති,
යං තුය්හං තුය්හමෙවෙතං නත්ථි දුච්චරිතං මම.

247. අනිච්චා හි චලා සද්ධා එවං දිට්ඨා හි සා මයා,
රජ්ජන්තිපි විරජ්ජනිති තත්ථ කිං ජිය්යතෙ මුනි.

248. පච්චති මුනිනො භත්තං ථොක ථොකං කුලෙ කුලෙ,
පිණ්ඩිකාය චරිස්සාමි අත්ථි ජඞ්ඝාබලං මමා’ති.

249. සද්ධාය අභිනික්ඛම්ම නවපබ්බජිතො නවො,
මිත්තෙ භජෙය්ය කල්යාණෙ සුද්ධාජීවෙ අතන්දිතෙ.

250. සද්ධාය අභිනික්ඛම්ම නවපබ්බජිතො නවො,
සඞ්ඝස්මිං විහරං භික්ඛු සික්ඛෙථ විනයං බුධො.

251. සද්ධාය අභිනික්ඛම්ම නවපබ්බජිතො නවො,
කප්පාකප්පෙසු කුසලො විහරෙය්ය අපුරක්ඛතො.

252. පණ්ඩිතං වත මං සන්තං අලමත්ථවිචින්තකං,
පඤ්චකාමගුණා ලොකෙ සම්මොහා පාතයිංසු මං.

253. පක්ඛන්නො මාරවිසයෙ දළ්හසල්ලසමප්පිතො,
අසක්ඛිං මච්චුරාජස්ස අහං පාසා පමුච්චිතුං.

254. සබ්බෙ කාමා පහීනා මෙ භවා සබ්බෙ විදාළිතා,
වික්ඛීණො ජාතිසංසාරො නත්ථි දානි පුනබ්භවො’ති.

255. සුණාථ ඤාතයො සබ්බෙ යාවන්තෙත්ථ සමාගතා,
ධම්මං වො දෙසයිස්සමි දුක්ඛා ජාති පුනප්පුනං.

256. ආරභථ නික්ඛමථ යුඤ්ජථ බුද්ධසාසනෙ,
ධුනාථ මච්චුනො සෙනං නළාගාරං ව කුඤ්ජරො.

257. යො ඉමස්මිං ධම්මවිනයෙ අප්පමත්තො විහෙස්සති
පහාය ජාතිසංසාරං දුක්ඛස්සන්තං කරිස්සතී’ති.

258. සංසරං හි නිරයං අගච්ඡිසං
පෙතලොකමගමං පුනප්පුනං,
දුක්ඛමම්හි පි තිරච්ඡානයොනියං
නෙකධා හි වුසිතං චිරං මයා.

259. මානුසො පි ච භවොභිරාධිතො
සග්ගකායමගමං සකිං සකිං,
රූපධාතුසු අරූපධාතුසු
නෙවසඤ්ඤිසු අසඤ්ඤීසුට්ඨිතං.

260. සම්භවා සුවිදිතා අසාරකා
සඞ්ඛතා පචලිතා සදෙරිතා,
තං විදිත්වා මහමත්තසම්භවං,
සන්තිමෙව සතිමා සමජ්ඣග’න්ති.

261. යො පුබ්බෙ කරණීයානි පච්ඡා සො කාතුමිච්ඡති,
සුඛා සො ධංසතෙ ඨානා පච්ඡා ච මනුතප්පති.

262. යඤ්හි කයිරා තඤ්හි වදෙ යං න කයිරා න තං වදෙ,
අකරොන්තං භාසමානං පරිජානන්ති පණ්ඩිතා.

263. සුසුඛං වත නිබ්බානං සම්මාම්බුද්ධදෙසිතං,
අසොකං විරජං ඛෙමං යත්ථ දුක්ඛං නිරුජ්ඣතී’ති.