2. 1. 10.
139. පුබ්බෙ හන්ති අත්තානං පච්ඡා හන්ති සො පරෙ,
සුහතං හන්ති අත්තානං වීතසෙනෙව පක්ඛිමා.
140. න බ්රාහ්මණො බහිවණ්ණො අන්තො වණ්ණො හි බ්රාහ්මණො,
යසුමිං පාපානි කම්මානි ස වෙ කණ්හො සුජම්පතී’ති.
ඉත්ථං සුදං ආයස්මා වසභො ථෙරො ගාථායො අභාසිත්ථා’ති.
වසභත්ථෙරගාථා.
වග්ගො පඨමො.
තස්සුද්දානං:
උත්තරො චෙව පිණ්ඩොලො වල්ලිතො තීරියො ඉසි,
අජිනො ච මෙලජිනො රාධො සුරාධො ගොතමො,
වසභෙන ඉමෙ හොන්ති දස ථෙරා මහිද්ධිකා’ති.
වග්ගො දුතියො.
2. 2. 1.
141. සුස්සූසා සුතවද්ධනී සුතං පඤ්ඤාය වද්ධනං,
පඤ්ඤාය අත්ථං ජානාති ඤාතො අත්ථො සුඛාවහො.
142. සෙවෙථ පන්තානි සෙනාසනානි
චරෙය්ය සංයොජන විප්පමොක්ඛං,
සචෙ රතිං නාධිගච්ඡෙය්ය තත්ථ
සඞ්ඝෙ වසෙ රක්ඛිතත්තො සතීමා’ති.
ඉත්ථං සුදං ආයස්මා මහාචුන්දො ථෙරො ගාථායො අභාසිත්ථා’ති.
මහාචුන්දත්ථෙරගාථා.
2. 2. 2.
143. යෙ ඛො තෙ වෙඝමිස්සෙන නානත්ථෙන ච කම්මුනා
මනුස්සෙ උපරුන්ධන්ති ඵරුසූපක්කමා ජනා,
තෙපි තත්ථෙව කීරන්ති නහි කම්මං පනස්සති.
144. යං කරොති නරො කම්මං කල්යාණං යදි පාපකං,
තස්ස තස්සෙව දායාදො යං යං කම්මං පකුබ්බතී’ති.
ඉත්ථං සුදං ආයස්මා ජොතිදාසො ථෙරො ගාථායො අභාසිත්ථා’ති.
ජොතිදාසත්ථෙරගාථා.
2. 2. 3.
145. අච්චයන්ති අහොරත්තා ජීවිතං උපරුජ්ඣති,
අයු ඛීයති මච්චානං කුන්නදීනං ව ඔදකං.
146. අථ පාපානි කම්මානි කරං බාලො න බුජ්ඣති,
පච්ඡාස්ස කටුකං හොති විපාකො හිස්ස පාපකො’ති.
ඉත්ථං සුදං ආයස්මා හෙරඤ්ඤකානිත්ථෙරො ගාථායො අභාසිත්ථා’ති.
හෙරඤ්ඤකානිත්ථෙරගාථා.
2. 2. 4.
147. පරිත්තං දාරුමාරුය්හ යථා සීදෙ මහණ්ණවෙ,
එවං කුසීතමාගම්ම සාධුජීවී පි සීදති,
තස්මා තං පරිවජ්ජෙය්ය කුසීතං හීනවීරියං.
148. පවිවිත්තෙහි අරියෙහි පහිතත්තෙහි ඣායිහි,
නිච්චං ආරද්ධවිරියෙහි පණ්ඩිතෙහි සහාවසෙ’ති.
ඉත්ථං සුදං ආයස්මා සොමචිත්තො ථෙරො ගාථායො අභාසිත්ථා’ති.
සොමචිත්තත්ථෙරගාථා.