866. ගච්ඡං වදෙසි සමණට්ඨිතොම්හි
මමං ච බ්රූසි ඨිතමට්ඨිතො’ති,
පුච්ඡාමි තං සමණ එතමත්ථං
කථං ඨිතො ත්වං අහමට්ඨිතොම්හි.

867. ඨිතො අහං අඞ්ගුලිමාල සබ්බදා
සබ්බෙසු භූතෙසු නිධාය දණ්ඩං,
තුවඤ්ච පාණෙසු අසඤ්ඤතොසි
තස්මා ඨිතොහං තුවමට්ඨිතොසි.

868. චිරස්සං වත මෙ මහිතො මහෙසි
මහාවනං සමණො පච්චුපාදි,
සො’හං චජිස්සාමි සහස්සපාපං
සුත්වාන ගාථං තව ධම්මයුත්තං.

869. ඉච්චෙව චොරො අසිමාවුධං ච
සොබ්භෙ පපාතෙ නරකෙ අන්වකාසි,
අවන්දි චොරො සුගතස්ස පාදෙ
තත්ථෙව පබ්බජ්ජමයාචි බුද්ධං.

870. බුද්ධො ච ඛො කාරුණිකො මහෙසි
යො සත්ථා ලොකස්ස සදෙවකස්ස,
තමෙහි භික්ඛූ’ති තදා අවොච
එසො’ව තස්ස අහු භික්ඛුභාවො.

871. යො ච පුබ්බෙ පමජ්ජිත්වා පච්ඡා සො නප්පමජ්ජති,
සො’මං ලොකං පභාසෙති අබ්භා මුත්තො’ව චන්දිමා.

872. යස්ස පාපං කතං කම්මං කුසලෙන පිථීයති,
සො’මං ලොකං පභාසෙති අබ්භා මුත්තො’ව චන්දිමා.

873. යො හවෙ දහරො භික්ඛු යුඤ්ජති බුද්ධසාසනෙ,
සො’මං ලොකං පභාසෙති අබ්භා මුත්තො’ව චන්දිමා.

874. දිසා’පි මෙ ධම්මකථං සුණන්තු
දිසා’පි මෙ යුඤ්ජන්තු බුද්ධසාසනෙ,
දිසා’පි මෙ තෙ මනුජෙ භජන්තු
යෙ ධම්මමෙවාදාපෙන්ති සන්තො.

875. දිසා හි මෙ ඛන්තිවාදානං අවිරොධප්පසංසිනං,
සුණන්තු ධම්මං කාලෙන තඤ්ච අනුවිධීයන්තු.

876. නහි ජාතු සො මමං හිංසෙ අඤ්ඤං වා පන කිඤ්චනං,
පප්පුය්ය පරමං සන්තිං රක්ඛෙය්ය තසථාවරෙ.

877. උදකං හි නයන්ති නෙත්තිකා උසුකාරා නමයන්ති තෙජනං,
දාරුං නමයන්ති තච්ඡකා අත්තානං දමයන්ති පණ්ඩිතා.

878. දණ්ඩෙනෙකෙ දමයන්ති අඞ්කුසෙහි කසාහි ච,
අදණ්ඩෙන අසත්ථෙන අහං අන්තොම්හි තාදිනා.

879. අභිංසකො’ති මෙ නාමං හිංසකස්ස පුරෙ සතො,
අජ්ජාහං සච්චනාමොම්හි න නං හිංසාමි කිඤ්චනං.

880. චොරො අහං පුරෙ ආසිං අඞ්ගුලිමාලො’ති විස්සුතො,
වුය්හමානො මහොඝෙන බුද්ධං සරණමාගමං.

881. ලොහිතපාණී පුරෙ ආසිං අඞ්ගුලිමාලො’ති විස්සුතො,
සරණාගමනං පස්ස භවනෙත්ති සමූහතා.

882. තාදිසං කම්මං කත්වාන බහුං දුග්ගතිගාමිනං
ඵුට්ඨො කම්මවිපාකෙන අනණො භුඤ්ජාමි භොජනං.

883. පමාදමනුයුඤ්ජන්ති බාලා දුම්මෙධිනො ජනා.
අප්පමාදං ච මෙධාවී ධනං සෙට්ඨං’ව රක්ඛති.

884. මා පමාදමනුයුඤ්ජෙථ මා කාමරතිසන්ථවං,
අප්පමත්තො හි ඣායන්තො පප්පොති පරමං සුඛං.

885. ස්වාගතං නාපගතං නෙතං දුම්මන්තිතං මම,
සංවිභත්තෙසු ධම්මෙසු යං සෙට්ඨං තදුපාගමං.