747. චිරරත්තං වතාතාපී ධම්මං අනුවිචින්තයං,
සමං චිත්තස්ස නාලත්ථං පුච්ඡං සමණබ්රාහ්මණෙ.

748. කො සො පාරඞ්ගතො ලොකෙ කො පත්තො අමතොගධං,
කස්ස ධම්මං පටිච්ඡාමි පරමත්ථවිජානනං.

749. අන්තොවඞ්කගතො ආසි මච්ඡොව ඝසමාමිසං,
බද්ධො මහින්දපාසෙන වෙපචිත්ත්යසුරො යථා.

750. අඤ්ඡාමි නං න මුඤ්චාමි අස්මා සොකපරිද්දවා,
කො මෙ බන්ධං මුඤ්චං ලොකෙ සම්බොධිං වෙදයිස්සති.

751. සමණං බ්රාහ්මණං වා කං ආදිසන්තං පභඞ්ගුනං,
කස්ස ධම්මං පටිච්ඡාමි ජරාමච්චුපවාහනං.

752. විචිකිච්ඡාකඞ්ඛාගථිතං සාරම්භබලසඤ්ඤුතං,
කොධප්පත්තමනත්ථද්ධං අභිජප්පප්පදාරණං.

753. තණ්හාධනුසමුට්ඨානං ද්වෙ ච පන්නරසායුතං,
පස්ස ඔරසිකං බාළ්හං භෙත්වා යදි තිට්ඨති.

754. අනුදිට්ඨීනං අප්පහානං සඞ්කප්පපරතෙජිතං,
තෙන විද්ධො පවෙධාමි පත්තං’ව මාලුතෙරිතං.

755. අජ්ඣත්තං මෙ සමුට්ඨාය ඛිප්පං පච්චති මාමකං,
ඡඵස්සායතනී කායො යත්ථ සරති සබ්බදා.

756. තං න පස්සාමි තෙකිච්ඡං යො මෙතං සල්ලමුද්ධරෙ,
නානාරජ්ජෙන සත්ථෙන නාඤ්ඤෙන විචිකිච්ඡිතං.

757. කො මෙ අසත්ථො අවණො සල්ලමබ්භන්තරපස්සයං,
අහිංසං සබ්බගත්තානි සල්ලං මෙ උද්ධරිස්සති.

758. ධම්මප්පති හි සො සෙට්ඨො විසදොසප්පවාහකො,
ගම්භීරෙ පතිතස්ස මෙ ථලං පාණිං ච දස්සයෙ.

759. රහදෙ’හමස්මි ඔගාළ්හො අහාරියරජමත්තිකෙ,
මායාඋසූයසාරම්භ ථීනමිද්ධමපත්ථටෙ.

760. උද්ධච්චමෙඝථනිතං සඤ්ඤොජනවලාහකං,
වාහා වහන්ති දුද්දිට්ඨිං සඞ්කප්පා රාගනිස්සිතා.

761. සවන්ති සබ්බධි සොතා ලතා උබ්භිජ්ජ තිට්ඨති,
තෙ සොතෙ කො නිවාරෙය්ය තං ලතං කො හි ඡෙච්ඡති.

762. වෙලං කරොථ භද්දන්තෙ සොතානං සන්නිවාරණං,
මා තෙ මනොමයො සොතො රුක්ඛං’ව සහසා ලුවෙ.

763. එවං මෙ භයජාතස්ස අපාරා පාරමෙසතො,
තාණො පඤ්ඤාවුධො සත්ථා ඉසිසඞ්ඝනිසෙවිතො.

764. සොපාණං සුකතං සුද්ධං ධම්මසාරමයං දළං,
පාදාසි වුය්හමානස්ස ‘මා භායී’ති ච අබ්රවී.

765. සතිපට්ඨානපාසාදං ආරුය්හ පච්චවෙක්ඛිසං,
යං තං පුබ්බෙ අමඤ්ඤිස්සං සක්කායාභිරතං පජං.

766. යදා ච මග්ගමද්දක්ඛිං නාවාය අභිරූහනං,
අනධිට්ඨාය අත්තානං තිත්ථමද්දක්ඛිමුත්තමං.

767. සල්ලං අත්තසමුට්ඨානං භවනෙත්තිපභාවිතං,
එතෙසං අප්පවත්තාය දෙසෙසි මග්ගමුත්තමං.

768. දීඝරත්තානුසයිතං චිරරත්තමධිට්ඨිතං,
බුද්ධො මෙ පානුදී ගන්ථං විසදොසප්පවාහනො’ති.