659. යථා’පි භද්දො ආජඤ්ඤො ධුරෙ යුත්තො ධුරාසහො,
මථිතො අතිභාරෙන සංයුගං නාතිවත්තති.

660. එවං පඤ්ඤාය යෙ තිත්තා සමුද්දො වාරිනා යථා,
න පරෙ අතිමඤ්ඤන්ති අරියධම්මො’ව පාණිනං.

661. කාලෙ කාලවසං පත්තා භවාභවවසං ගතා,
නරා දුක්ඛං නිගච්ඡන්ති තෙධ සොචන්ති මානවා.

662. උන්නතා සුඛධම්මෙන දුක්ඛධම්මෙන චොනතා,
ද්වයෙන බාලා හඤ්ඤන්ති යථාභූතං අදස්සිනො.

663. යෙ ච දුක්ඛෙ සුඛස්මිං ච මජ්ඣසිබ්බනිමච්චගූ
ඨිතා තෙ ඉන්දඛීලො’ව න තෙ උන්නතඔනතා.

664. නහෙව ලාභෙ නාලාභෙ අයසෙ න ච කිත්තියා,
න නින්දායං පසංසාය න තෙ දුක්ඛෙ සුඛම්හි ච.

665. සබ්බත්ථ තෙ න ලිප්පන්ති උදබින්දූව පොක්ඛරෙ,
සබ්බත්ථ සුඛිතා ධීරා සබ්බත්ථ අපරාජිතා.

666. ධම්මෙන ච අලාභො යො යො ච ලාභො අධම්මිකො,
අලාභො ධම්මිකො සෙය්යො යං වෙ ලාභො අධම්මිකො.

667. යසො ච අප්පබුද්ධීනං විඤ්ඤූනං අයසො ච යො,
අයසො’ව සෙය්යො විඤ්ඤූනං න යසො අප්පබුද්ධිනං.

668. දුම්මෙධෙහි පසංසා ච විඤ්ඤූහි ගරහා ච යා,
ගරහා’ව සෙය්යො විඤ්ඤූහි යං චෙ බාලපසංසනා.

669. සුඛං ච කාමමයිකං දුක්ඛං ච පවිවෙකියං,
පවිවෙකදුක්ඛං සෙය්යො යං චෙ කාමමයං සුඛං.

670. ජීවිතං ච අධම්මෙන ධම්මෙන මරණං ච යං,
මරණං ධම්මිකං සෙය්යො යං චෙ ජීවෙ අධම්මිකං.

671. කාමකොපප්පහීනා යෙ සන්තචිත්තා භවාභවෙ,
චරන්ති ලොකෙ අසිතා නත්ථි තෙසං පියාප්පියං.

672. භාවයිත්වාන බොජ්ඣඞ්ගෙ ඉන්ද්රියානි බලානි ච,
පප්පුය්ය පරමං සන්තිං පරිනිබ්බන්ත්යනාසවා’ති.

රෙවතො චෙව ගොදත්තො ථෙරා ද්වෙ තෙ මහිද්ධිකා,
චුද්දසම්හි නිපාතම්හි ගාථායො අට්ඨවීසතී’ති.