645. යදා අහං පබ්බජිතො අගාරස්මානගාරියං,
නාභිජානාමි සඞ්කප්පං අනරියං දොසසංහිතං.

646. ඉමෙ හඤ්ඤන්තු වජ්ඣන්තු දුක්ඛං පප්පොන්තු පාණිනො,
සඞ්කප්පං නාභිජානාමි ඉමස්මිං දීඝමන්තරෙ.

647. මෙත්තං ච අභිජානාමි අප්පමාණං සුභාවිතං,
අනුපුබ්බං පරිචිතං යථා බුද්ධෙන දෙසිතං.

648. සබ්බමිත්තො සබ්බසඛො සබ්බභූතානුකම්පකො,
මෙත්තං චිත්තං ච භාවෙමි අබ්යාපජ්ඣරතො සදා.

649. අසංහීරං අසංකුප්පං චිත්තං ආමොදයාමහං,
බ්රහ්මවිහාරං භාවෙමි ආකාපුරිසසෙවිතං.

650. අවිතක්කං සමාපන්නො සම්මාසම්බුද්ධසාවකො,
අරියෙන තුණ්හීභාවෙන උපෙතො හොති තාවදෙ.

651. යථා’පි පබ්බතො සෙලො අචලො සුප්පතිට්ඨිතො,
එවං මොහක්ඛයා භික්ඛු පබ්බතො’ව න වෙධති.

652. අනඞ්ගණස්ස පොසස්ස නිච්චං සුචිගවෙසිනො,
වාලග්ගමත්තං පාපස්ස අබ්භමත්තං ව ඛායති.

653. නගරං යථා පච්චන්තං ගුත්තං සන්තරබාහිරං,
එවං ගොපෙථ අත්තානං ඛණො වො මා උපච්චගා.

654. නාභිනන්දාමි මරණං නාභිනන්දාමි ජීවිතං,
කාලං ච පටිකඞ්ඛාමි නිබ්බිසං භතකො යථා.

655. නාභිනන්දාමි මරණං නාභිනන්දාමි ජීවිතං,
කාලං ච පටිකඞ්ඛාමි සම්පජානො පතිස්සතො.

656. පරිචිණ්ණො මයා සත්ථා කතං බුද්ධස්ස සාසනං,
ඔහිතො ගරුකො භාරො භවනෙත්ති සමූහතා.

657. යස්ස චත්ථාය පබ්බජිතො අගාරස්මානගාරියං,
සො මෙ අත්ථො අනුප්පත්තො සබ්බසඤ්ඤොජනක්ඛයො.

658. සම්පාදෙථප්පමාදෙන එසා මෙ අනුසාසනී,
හන්දාහං පරිනිබ්බිස්සං විප්පමුත්තොම්හි සබ්බධී’ති.

659. යථා’පි භද්දො ආජඤ්ඤො ධුරෙ යුත්තො ධුරාසහො,
මථිතො අතිභාරෙන සංයුගං නාතිවත්තති.

660. එවං පඤ්ඤාය යෙ තිත්තා සමුද්දො වාරිනා යථා,
න පරෙ අතිමඤ්ඤන්ති අරියධම්මො’ව පාණිනං.

661. කාලෙ කාලවසං පත්තා භවාභවවසං ගතා,
නරා දුක්ඛං නිගච්ඡන්ති තෙධ සොචන්ති මානවා.

662. උන්නතා සුඛධම්මෙන දුක්ඛධම්මෙන චොනතා,
ද්වයෙන බාලා හඤ්ඤන්ති යථාභූතං අදස්සිනො.

663. යෙ ච දුක්ඛෙ සුඛස්මිං ච මජ්ඣසිබ්බනිමච්චගූ
ඨිතා තෙ ඉන්දඛීලො’ව න තෙ උන්නතඔනතා.

664. නහෙව ලාභෙ නාලාභෙ අයසෙ න ච කිත්තියා,
න නින්දායං පසංසාය න තෙ දුක්ඛෙ සුඛම්හි ච.

665. සබ්බත්ථ තෙ න ලිප්පන්ති උදබින්දූව පොක්ඛරෙ,
සබ්බත්ථ සුඛිතා ධීරා සබ්බත්ථ අපරාජිතා.

666. ධම්මෙන ච අලාභො යො යො ච ලාභො අධම්මිකො,
අලාභො ධම්මිකො සෙය්යො යං වෙ ලාභො අධම්මිකො.

667. යසො ච අප්පබුද්ධීනං විඤ්ඤූනං අයසො ච යො,
අයසො’ව සෙය්යො විඤ්ඤූනං න යසො අප්පබුද්ධිනං.

668. දුම්මෙධෙහි පසංසා ච විඤ්ඤූහි ගරහා ච යා,
ගරහා’ව සෙය්යො විඤ්ඤූහි යං චෙ බාලපසංසනා.