1. 7. 7.
67. කිලෙසා ඣාපිතා මය්හං භවා සබ්බෙ සමූහතා
වික්ඛීණො ජාතිසංසාරො නත්ථි දානි පුනබ්භවො’ති.
ඉත්ථං සුදං ආයස්මා එකධම්මසවනීයො ථෙරො ගාථං අභාසිත්ථා’ති.
එකධම්මසවනීයත්ථෙරගාථා.
1. 7. 8.
68. අධිචෙතසො අප්පමජ්ජතො මුනිනො මොනපථෙසු සික්ඛතො
සොකා න භවන්ති තාදිනො උපසන්තස්ස සදා සතීමතො’ති.
ඉත්ථං සුදං ආයස්මා එකුදානියො ථෙරො ගාථං අභාසිත්ථා’ති.
එකුදානියත්ථෙරගාථා.
1. 7. 9.
69. සුත්වාන ධම්මං මහතො මහාරසං
සබ්බඤ්ඤුතඤ්ඤණවරෙන දෙසිතං
මග්ගං පපජ්ජිං අමතස්ස පත්තියා
සො යොගක්ඛෙමස්ස පථස්ස කොවිදො’ති.
ඉත්ථං සුදං ආයස්මා ඡන්නො ථෙරො ගාථං අභාසිත්ථා’ති.
ඡන්නත්ථෙරගාථා.
1. 7. 10.
70. සීලමෙව ඉධ අග්ගං පඤ්ඤවා පන උත්තමො
මනුස්සෙසු ච දෙවෙ සු සීලපඤ්ඤාණතො ජය’න්ති.
ඉත්ථං සුදං ආයස්මා පුණ්ණො ථෙරො ගාථං අභාසිත්ථා’ති.
පුණ්ණත්ථෙරගාථා.
සත්තමො වග්ගො.
තස්සුද්දානං:
වප්පො ච වජ්ජිපුත්තො ච පක්ඛො විමලකොණ්ඩඤ්ඤො
උක්ඛෙපකටවච්ඡො ච මෙඝියො එකධම්මිකො
එකුදානියච්ඡන්නා ච පුණ්ණත්ථෙරො මහබ්බලො’ති.
අට්ඨමො වග්ගො
1. 8. 1.
71. සුසුඛුමනිපුණත්ථදස්සිනා මතිකුසලෙන නිවාතවුත්තිනා
සංසෙවිත වුද්ධසීලිනා නිබ්බානං න හි තෙන දුල්ලභ’න්ති.
ඉත්ථං සුදං ආයස්මා වච්ඡපාලො ථෙරො ගාථං අභාසිත්ථා’ති.
වච්ඡපාලත්ථෙරගාථා.
1. 8. 2.
72. යථා කළීරො සුසු වඩ්ඪිතග්ගො
දුන්නික්ඛමො හොති පසාඛජාතො
එවං අහං භරියායානීතාය
අනුමඤ්ඤ මං පබ්බජිතොම්හි දානී’ති.
ඉත්ථං සුදං ආයස්මා ආතුමො ථෙරො ගාථං අභාසිත්ථා’ති.
ආතුමත්ථෙරගාථා.
1. 8. 3.
73. ජිණ්ණං ච දිස්වා දුඛිතං ච බ්යාධිතං
මතං ච දිස්වා ගතමායුසඞ්ඛයං
තතො අහං නික්ඛමිතූන පබ්බජිං
පහාය කාමානි මනොරමානී’ති.
ඉත්ථං සුදං ආයස්මා මාණවො ථෙරො ගාථං අභාසිත්ථා’ති.
මාණවත්ථෙරගාථා.
1. 8. 4.
74. කාමච්ඡන්දො ච බ්යාපාදො ථීනමිද්ධං ච භික්ඛුනො
උද්ධච්චං විචිකිච්ඡා ච සබ්බසො’ව න විජ්ජතී’ති.
ඉත්ථං සුදං ආයස්මා සුයාමො ථෙරො ගාථං අභාසිත්ථා’ති.
සුයාමත්ථෙරගාථා.
1. 8. 5.
75. සාධු සුවිහිතාන දස්සනං කඞ්ඛා ඡිජ්ජති බුද්ධි වඩ්ඪති
බාලම්පි කරොන්ති පණ්ඩිතං තස්මා සාධු සතං සමාගමො’ති.
ඉත්ථං සුදං ආයස්මා සුසාරදො ථෙරො ගාථං අභාසිත්ථා’ති.
සුසාරදත්ථෙරගාථා.
1. 8. 6.
76. උප්පතන්තෙසු නිපතෙ නිපතන්තෙසු උප්පතෙ
වසෙ අවසමානෙසු රමමානෙසු නො රමෙ’ති.
ඉත්ථං සුදං ආයස්මා පියඤ්ජහො ථෙරො ගාථං අභාසිත්ථා’ති.
පියඤ්ජහත්ථෙරගාථා.