සත්තමො වග්ගො
1. 7. 1.
61. පස්සති පස්සො පස්සන්තං අපස්සන්තං ච පස්සති
අපස්සන්තො අපස්සන්තං පස්සන්තං ච න පස්සතී’ති.
ඉත්ථං සුදං ආයස්මා වප්පො ථෙරො ගාථං අභාසිත්ථා’ති.
වප්පත්ථෙරගාථා.
1. 7. 2.
62. එකකා මයං අරඤ්ඤෙ විහරාම
අපවිද්ධං ව වනස්මිං දාරුකං
තස්ස මෙ බහුකා පිහයන්ති
නෙරයිකා විය සග්ගගාමිනන්ති.
ඉත්ථං සුදං ආයස්මා වජ්ජිපුත්තො ථෙරො ගාථං අභාසිත්ථා’ති.
වජ්ජිපුත්තත්ථෙරගාථා.
1. 7. 3.
63. චුතා පතන්ති පතිතා ගිද්ධා ච පුනරාගතා
කතං කිච්චං රතං රම්මං සුඛෙනන්වාගතං සුඛන්ති.
ඉත්ථං සුදං ආයස්මා පක්ඛො ථෙරො ගාථං අභාසිත්ථා’ති.
පක්ඛත්ථෙරගාථා.
1. 7. 4.
64. දුමව්හයාය උප්පන්නො ජාතො පණ්ඩරකෙතුනා
කෙතුහා කෙතුනායෙව මහාකෙතුං පධංසයීති.
ඉත්ථං සුදං ආයස්මා විමලො කොණ්ඩඤ්ඤො ථෙරො ගාථං අභාසිත්ථා’ති.
විමලකොණ්ඩඤ්ඤත්ථෙරගාථා.
1. 7. 5.
65. උක්ඛෙපකටවච්ඡස්ස සඞ්කලිතං බහූහි වස්සෙහි
තං භාසති ගහට්ඨානං සුනිසින්නො උළාරපාමොජ්ජො’ති.
ඉත්ථං සුදං ආයස්මා උක්ඛෙපකටවච්ඡො ථෙරො ගාථං අභාසිත්ථා’ති.
උක්ඛෙපකටවච්ඡත්ථෙරගාථා.
1. 7. 6.
66. අනුසාසි මහාවීරො සබ්බධම්මානපාරගූ
තස්සාහං ධම්මං සුත්වාන විහාසිං සන්තිකෙ සතො
තිස්සො විජ්ජා අනුප්පත්තා කතං බුද්ධස්ස සාසන’න්ති.
ඉත්ථං සුදං ආයස්මා මෙඝියො ථෙරො ගාථං අභාසිත්ථා’ති.
මෙඝියත්ථෙරගාථා.
1. 7. 7.
67. කිලෙසා ඣාපිතා මය්හං භවා සබ්බෙ සමූහතා
වික්ඛීණො ජාතිසංසාරො නත්ථි දානි පුනබ්භවො’ති.
ඉත්ථං සුදං ආයස්මා එකධම්මසවනීයො ථෙරො ගාථං අභාසිත්ථා’ති.
එකධම්මසවනීයත්ථෙරගාථා.
1. 7. 8.
68. අධිචෙතසො අප්පමජ්ජතො මුනිනො මොනපථෙසු සික්ඛතො
සොකා න භවන්ති තාදිනො උපසන්තස්ස සදා සතීමතො’ති.
ඉත්ථං සුදං ආයස්මා එකුදානියො ථෙරො ගාථං අභාසිත්ථා’ති.
එකුදානියත්ථෙරගාථා.
1. 7. 9.
69. සුත්වාන ධම්මං මහතො මහාරසං
සබ්බඤ්ඤුතඤ්ඤණවරෙන දෙසිතං
මග්ගං පපජ්ජිං අමතස්ස පත්තියා
සො යොගක්ඛෙමස්ස පථස්ස කොවිදො’ති.
ඉත්ථං සුදං ආයස්මා ඡන්නො ථෙරො ගාථං අභාසිත්ථා’ති.
ඡන්නත්ථෙරගාථා.
1. 7. 10.
70. සීලමෙව ඉධ අග්ගං පඤ්ඤවා පන උත්තමො
මනුස්සෙසු ච දෙවෙ සු සීලපඤ්ඤාණතො ජය’න්ති.
ඉත්ථං සුදං ආයස්මා පුණ්ණො ථෙරො ගාථං අභාසිත්ථා’ති.
පුණ්ණත්ථෙරගාථා.
සත්තමො වග්ගො.
තස්සුද්දානං:
වප්පො ච වජ්ජිපුත්තො ච පක්ඛො විමලකොණ්ඩඤ්ඤො
උක්ඛෙපකටවච්ඡො ච මෙඝියො එකධම්මිකො
එකුදානියච්ඡන්නා ච පුණ්ණත්ථෙරො මහබ්බලො’ති.