919. පුච්ඡාමි තං ආදිච්චබන්ධුං
විවෙකං සන්තිපදඤ්ච මහෙසිං,
කථං දිස්වා නිබ්බාති භික්ඛු
අනුපාදියානො ලොකස්මිං කිඤ්චි.

920. මූලං පපඤ්ච සඞ්ඛාය (ඉති භගවා)
මන්තා අස්මීති සබ්බමුපරුන්ධෙ,
යා කාචි තණ්හා අජ්ඣත්තං
තාසං විනයා සදා සතො සික්ඛෙ.

921. යං කිඤ්චි ධම්මමභිජඤ්ඤා,
අජ්ඣත්තං අථවාපි බහිද්ධා,
න තෙන මානං කුබ්බෙථ
න හි සා නිබ්බුති සතං වුත්තා.

922. සෙය්යො න තෙන මඤ්ඤෙය්ය
නීචෙය්යො අථ වාපි සරික්ඛො,
ඵුට්ඨො අනෙකරූපෙහි
නාතුමානං විකප්පයං තිට්ඨෙ.

923. අජ්ඣත්තමෙව උපසමෙ
න අඤ්ඤතො භික්ඛු සන්තිමෙසෙය්ය,
අජ්ඣත්තං උපසන්තස්ස
නත්ථී අත්තා කුතො නිරත්තා වා.

924. මජ්ඣෙ යථා සමුද්දස්ස
ඌමි නො ජායති ඨිතො හොති,
එවං ඨිතො අනෙජස්ස
උස්සදං භික්ඛු න කරෙය්ය කුහිඤ්චි.

925. අකිත්තයී විවටචක්ඛු
සක්ඛිධම්මං පරිස්සයවිනයං.
පටිපදං වදෙහි භද්දන්තෙ
පාතිමොක්ඛං අථවාපි සමාධිං.

926. චක්ඛූහි නෙව ලොලස්ස
ගාමකථාය ආවරෙය්ය සොතං,
රසෙ ච නානුගිජ්ඣෙය්ය
න ච මමායෙථ කිඤ්චි ලොකස්මිං.

927. ඵස්සෙන යදා ඵුට්ඨස්ස
පරිදෙවං භික්ඛු න කරෙය්ය කුහිඤ්චි
භවං ච නාභිජප්පෙය්ය
භෙරවෙසු ච න සම්පවෙධෙය්ය.

928. අන්නානමථො පානානං
ඛාදනීයානං අථොපි වත්ථානං,
ලද්ධා න සන්නිධිං කයිරා
න ච පරිත්තසෙ තානි අලභමානො.

929. ඣායී න පාදලොල’ස්ස
විරමෙ කුක්කුච්චා නප්පමජ්ජෙය්ය,
අථ ආසනෙසු සයනෙසු
අප්පසද්දෙසු භික්ඛු විහරෙය්ය.