899. යෙ කෙචි ‘මෙ දිට්ඨි පරිබ්බසානා
ඉදමෙව සච්චන්ති විවාදයන්ති,
සබ්බෙව තෙ නින්දමන්වානයන්ති
අථො පසංසම්පි ලභන්ති තත්ථ.

900. අප්පං හි එතං න අලං සමාය
දුවෙ විවාදස්ස ඵලානි බ්රූමි,
එවම්පි දිස්වා න විවාදයෙථ
ඛෙමාභිපස්සං අවිවාදභූමිං.

901. යා කාචිමා සම්මුතියො පුථුජ්ජා
සබ්බා’ව එතා න උපෙති විද්වා,
අනූපයො සො උපයං කිමෙය්ය
දිට්ඨෙ සුතෙ ඛන්තිමකුබ්බමානො.

902. සීලුත්තමා සඤ්ඤමෙනාහු සුද්ධිං
වතං සමාදාය උපට්ඨිතා සෙ,
ඉධෙ’ව සික්ඛෙම අථස්ස සුද්ධිං
භවූපනීතා කුසලා වදානා.

903. සචෙ චුතො සීලවතතො හොති
ස වෙධති කම්මං විරාධයිත්වා,
ස ජප්පති පත්ථයතීධ සුද්ධිං
සත්ථා ච හීනො පවසං ඝරම්හා.

904. සීලබ්බතං වාපි පහාය සබ්බං
කම්මඤ්ච සාවජ්ජනවජ්ජමෙතං,
සුද්ධිං අසුද්ධින්ති අපත්ථයානො
විරතො චරෙ සන්තිමනුග්ගහාය.

905. තමූපනිස්සාය ජිගුච්ඡිතං වා
අථවාපි දිට්ඨං ව සුතං මුතං වා,
උද්ධංසරා සුද්ධිමනුත්ථුනන්ති
අවීතතණ්හා සෙ භවාභවෙසු.

906. පත්ථයමානස්ස හි ජප්පිතානි
පවෙධිතං වාපි පකප්පිතෙසු,
චුතූපපාතො ඉධ යස්ස නත්ථි
ස කෙන වෙධෙය්ය කුහිංව ජප්පෙ.

907. යමාහු ධම්මං පරමන්ති එකෙ
තමෙව හීනන්ති පනාහු අඤ්ඤෙ,
සච්චො නු වාදො කතමො ඉමෙසං
සබ්බෙව හි මෙ කුසලා වදානා.

908. සකං හි ධම්මං පරිපුණ්ණමාහු
අඤ්ඤස්ස ධම්මං පන හීනමාහු,
එවම්පි විග්ගය්හ විවාදයන්ති
සකං සකං සම්මුතිමාහු සච්චං.