241. සාමාකචිඞ්ගුළකචීනකානි ච
පත්තප්ඵලං මූලප්ඵලං ගවිප්ඵලං,
ධම්මෙන ලද්ධං සතමස්නමානා
න කාමකාමා අලිකං භණන්ති.

242. යදස්නමානො සුකතං සුනිට්ඨිතං
පරෙහි දින්නං පයතං පණීතං,
සාලීනමන්නං පරිභුඤ්ජමානො
සො භුඤ්ජතී කස්සප ආමගන්ධං.

243. න ආමගන්ධො මම කප්පතීති
ඉච්චෙව ත්වං භාසසි බ්රහ්මබන්ධු,
සාලීනමන්නං පරිභුඤ්ජමානො
සකුන්තමංසෙහි සුසංඛතෙහි,
පුච්ඡාමි තං කස්සප එතමත්ථං
කථංපකාරො තව ආමගන්ධො.

244. පාණාතිපාතො වධඡෙදබන්ධනං
ථෙය්යං මුසාවාදො නිකතී වඤ්චනානි,
අජ්ඣෙනකුජ්ඣං පරදාරසෙවනා
එසාමගන්ධො න හි මංසභොජනං.

245. යෙ ඉධ කාමෙසු අසඤ්ඤතා ජනා
රසෙසු ගිද්ධා අසුචීකමිස්සිතා,
නත්ථිකදිට්ඨි විසමා දුරන්නයා
එසාමගන්ධො න හි මංසභොජනං.

246. යෙ ලූඛසා දාරුණා පිට්ඨිමංසිකා,
මිත්තද්දුනො නික්කරුණා තිමානිනො
අදානසීලා න ච දෙන්ති කස්සචි
එසාමගන්ධො න හි මංසභොජනං.

247. කොධො මදො ථම්භො පච්චුට්ඨාපනා ච
මායා උසූයා භස්සසමුස්සයො ව,
මානාතිමානො ච අසබ්භි සන්ථවො
එසාමගන්ධො න හි මංසයොජනං.

248. යෙ පාපසීලා ඉණඝාතසුචකා
වොහාරකූටා ඉධ පාටිරූපිකා
නරාධමා යෙ’ධ කරොන්ති කිබ්බිසං
එසාමගන්ධො න හි මංසභොජනං.

249. යො ඉධ පාණෙසු අසඤ්ඤතා ජනා
පරෙසමා’දාය විහෙසමුය්යුතා,
දුස්සීලලුද්දා ඵරුසා අනාදරා
එසාමගන්ධො න හි මංසභොජනං.

250. එතෙසු ගිද්ධා විරුද්ධාතිපාතිනො
නිච්චුය්යුතා පෙච්ච තමං වජන්ති යෙ,
පතන්ති සත්තා නිරයං අවංසිරා
එසාමගන්ධො න හි මංසභොජනං.

251. න මච්ඡමංසං නානසකත්තං
න නග්ගියං න මුණ්ඩියං ජටාජල්ලං
ඛරාජිනානි නාග්ගිහුත්තස්සුපසෙවනා වා
යෙ චාපි ලොකෙ අමරා බහූ තපා
මන්තා’හුතී යඤ්ඤමුතූපවෙසනා
සොධෙන්ති මච්චං අවිතිණ්ණකඞ්ඛං.

252. සොතෙසු ගුත්තො විදිතින්ද්රියො චරෙ
ධම්මෙ ඨිතො අජ්ජවමද්දචෙ රතො,
සඞ්ගාතිගො සබ්බදුක්ඛප්පහීනො
න ලිප්පතී දිට්ඨසුතෙසු ධීරො.