2. 3.
හිරිසුත්තං
255. හිරිං තරන්තං විජිගුච්ඡමානං
සඛා හමස්මි ඉති භාසමානං,
සය්හානි කම්මානි අනාදියන්තං
නෙ සො මමන්ති ඉති තං විජඤ්ඤා.
256. අනන්වයං පියං වාචං යො මිත්තෙසු පකුබ්බති,
අකරොන්තං භාසමානං පරිජානන්ති පණ්ඩිතා.
257. න සො මිත්තො යො සදා අප්පමත්තො
භෙදා සඞ්කි රන්ධමෙවානුපස්සී,
යස්මිඤ්ච සෙති උරසීව පුත්තො
ස වෙ මිත්තො සො පරෙහි අභෙජ්ජො.
258. පාමුජ්ජකරණං ඨානං පසංසාවහනං සුඛං,
ඵලානිසංසො භාවෙති වහන්තො පොරිසං ධුරං.
259. පවිවෙකරසං පීත්වා රසං උපසමස්ස ච,
නිද්දරො හොති නිප්පාපො ධම්මපීති රසං පිබන්ති.
හිරිසුත්තං නිට්ඨිතං.
2. 4.
මංගලසුත්තං
එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො අඤ්ඤතරා දෙවතා අභික්කන්තාය රත්තියා අභික්කන්තවණ්ණා කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි, උපසඞ්කමිත්වා භගවන්තං අභිවාදෙත්වා එකමන්තං අට්ඨාසි, එකමන්තං ඨිතා ඛො සා දෙවතා භගවන්තං ගාථාය අජ්ඣභාසි.
260. බහු දෙවා මනුස්සා ච මඞ්ගලානි අචින්තයුං,
ආකඞ්ඛමානා සොත්ථානං බ්රූහි මඞ්ගල මුත්තමං.
261. අසෙවනා ච බාලානං පණ්ඩිතානඤ්ච සෙවනා,
පූජා ච පූජනීයානං එතං මඞ්ගලමුත්තමං.
262. පතිරූපදෙසවාසො ච පුබ්බෙ ච කතපුඤ්ඤතා,
අත්තසම්මාපණිධි ච එතං මඞ්ගලමුත්තමං.
263. බාහුසච්චඤ්ච සිප්පඤ්ච විනයො ච සුසික්ඛිතො,
සුභාසිතා ච යා වාචා එතං මඞ්ගලමුත්තමං.
264. මාතාපිතූ උපට්ඨානං පුත්තදාරස්ස සඞ්ගහො,
අනාකුලා ච කම්මන්තා එතං මඞ්ගලමුත්තමං.
265. දානඤ්ච ධම්මචරියා ච ඤාතකානඤ්ච සඞ්ගහො,
අනවජ්ජානි කම්මානි එතං මඞ්ගලමුත්තමං.
266. ආරති විරති පාපා මජ්ජපානා ච සඤ්ඤමො,
අප්පමාදො ච ධම්මෙසු එතං මඞ්ගලමුත්තමං.
267. ගාරවො ච නිවාතො ච සන්තුට්ඨි ච කතඤ්ඤුතා,
කාලෙන ධම්මසවණං එතං මඞ්ගලමුත්තමං.