4. 5.
746. ඉදං මමං උච්ඡුවනං මහන්තං
නිබ්බත්තති පුඤ්ඤඵලං අනප්පකං,
තං දානි වෙ පරිභොගං න උපෙති
ආචික්ඛ භන්තෙ කිස්ස අයං විපාකො.
747. හඤ්ඤාමි ඛජ්ජාමි ච වායමාමි
පරිසක්කාමි පරිභුඤ්ජිතුං කිඤ්චි.
ස්වාහං ඡින්නථාමො කපණො ලාලපාමි
කිස්ස කම්මස්ස අයං විපාකො.
748. විඝාතො චාහං පරිපතාමි ඡමායං
පරිවත්තාමි වාරිචරොව ඝම්මෙ,
රුදතො ච මෙ අස්සුකා නිග්ගලන්ති
ආචික්ඛ භන්තෙ කිස්ස අයං විපාකො.
749. ඡාතො කිලන්තො ච පිපාසිතො ච
සන්තසිතො සාතසුඛං න වින්දෙ,
පුච්ඡාමි තං එතමත්ථං භදන්ත
කථන්නු උච්ඡුපරිභොගං ලභෙය්යං.
750. පුරෙ තුවං කම්මමකාසි අත්තනා
මනුස්සභූතො පුරිමාය ජාතියා,
අහං ච තං එතමත්ථං වදාමි
සුත්වාන ත්වං එතමත්ථං විජාන.
751. උච්ඡුං තුවං ඛාදමානො පයාතො
පුරිසො ච තෙ පිට්ඨිතො අන්වගච්ඡි,
සො ච තං පච්චාසංසන්තො කථෙසි
තස්ස තුවං න කිඤ්චි ආලපිත්ථ.
752. සො ච තං අභණන්තං අයාචි
දෙහය්ය උච්ඡුන්ති ච තං අවොච,
තස්ස තුවං පිට්ඨිතො උච්ඡුං අදාසි
තස්සෙතං කම්මස්ස අයං විපාකො.
753. ඉඞ්ඝ තුවං පිට්ඨිතො ගණ්හ උච්ඡුං
ගහෙත්වාන ඛාදස්සු යාවදත්ථං,
තෙනෙව ත්වං අත්තමනො භවිස්සසි
හට්ඨො චුදග්ගො ච පමොදිතො ච.
754. ගන්ත්වාන සො පිට්ඨිතො අග්ගහෙසි
ගහෙත්වාන තං ඛාදි යාවදත්ථං,
තෙනෙව සො අත්තමනො අහොසී
හට්ඨො චුදග්ගො ච පමොදිතො චා’ති.
උච්ඡුපෙතවත්ථු පඤ්චමං.
4. 6.
755. සාවත්ථි නාම නගරං හිමවන්තස්ස පස්සතො,
තත්ථ ආසුං ද්වෙ කුමාරා රාජපුත්තාති මෙ සුතං.
756. පමත්තා රජනීයෙසු කාමස්සාදාභිනන්දිනො,
පච්චුප්පන්නෙ සුඛෙ ගිද්ධා න තෙ පස්සිංසු නාගතං.