73. පුරතොව සෙතෙන පලෙති හත්ථිනා
මජ්ඣෙ පන අස්සතරීරථෙන,
පච්ඡා ච කඤ්ඤා සිවිකාය නිය්යති
ඔභාසයන්ති දස සබ්බසො දිසා.

74. තුම්හෙ පන මුග්ගරහත්ථපාණිනො
රුදම්මුඛා භින්නපභින්නගත්තා,
මනුස්සභූතා කිමකත්ථ පාපං
යෙනඤ්ඤ මඤ්ඤස්ස පිවාථ ලොහිත’න්ති.

75. පුරතොව යො ගච්ඡති කුඤ්ජරෙන
සෙතෙන නාගෙන චතුක්කමෙන,
අම්හාක පුත්තො අහු ජෙට්ඨකො සො
දානානි දත්වාන සුඛී පමොදති.

76. යො සො මජ්ඣෙ අස්සතරී රථෙන
චතුබ්භි යුත්තෙන සුවග්ගිතෙන,
අම්හාක පුත්තො අහු මජ්ඣිමො සො
අමච්ඡරී දානපතී විරොචති.

77. යා සා ච පච්ඡා සිවිකා යනිය්යති
නාරී සපඤ්ඤා මිගමන්දලොචනා,
අම්හාක ධීතා අහු සා කනිට්ඨා
භාගඩ්ඪභාගෙන සුඛී පමොදති.

78. එතෙ ච දානානි අදංසු පුබ්බෙ
පසන්නචිත්තා සමණබ්රාහ්මණානං,
මයම්පන මච්ඡරිනො අහුම්හා
පරිභාසකා සමණබ්රාහ්මණානං.
එතෙ පදත්වා පරිචාරයන්ති
මයඤ්ච සුස්සාම නළොව ඛිත්තො’ති.

79. කිං තුම්හාකං භොජනං කිං සයනං
කථංසු යාපෙථ සුපාපධම්මිනො,
පහූතභොගෙසු අනප්පකෙසු
සුඛං විරාධාය දුඛජ්ජ පත්තා’ති.

80. අඤ්ඤමඤ්ඤං වධිත්වාන පිවාම පුබ්බලොහිතං
බහුං පීත්වා න ධාතා හොම නච්ඡාදිම්භසෙ මයං.

81. ඉච්චෙව වච්චා පරිදෙවයන්ති
අදායකා පෙච්ච යමස්ස ඨායිනො,
යෙ තෙ විදිත්වා අධිගම්ම භොගෙ
න භුඤ්ජරෙ නාපි කරොන්ති පුඤ්ඤං.

82. තෙ ඛුප්පිපාසූපගතා පරත්ථ
පෙතා චිරං ඣායරෙ ඩය්හමානා,
කම්මානි කත්වාන දුඛුද්රයානි
අනුභොන්ති දුක්ඛං කටුකප්ඵලානි.

83. ඉත්තරං හි ධනං ධඤ්ඤං ඉත්තරං ඉධ ජීවිතං,
ඉත්තරං ඉත්තරතො ඤත්වා දීපං කයිරාථ පණ්ඩිතො.

84. යෙ තෙ එවං පජානන්ති නරා ධම්මස්ස කොවිදා
තෙ දානෙ නප්පමජ්ජන්ති සුත්වා අරහතං වචො’ති.

85. උරගොව තචං ජිණ්ණං හිත්වා ගච්ඡති සංතනුං,
එවං සරීරෙ නිබ්භොගෙ පෙතෙ කාලකතෙ සති.

86. ඩය්හමානො න ජානාති ඤාතීනං පරිදෙවිතං
තස්මා එතං න රොදාමි ගතො සො තස්ස යා ගතී’ති.

87. අනවහිතො තතො ආග නානුඤ්ඤතො ඉතො ගතො,
යථාගතො තථාගතො කා තත්ථ පරිදෙවනා.