85. උරගොව තචං ජිණ්ණං හිත්වා ගච්ඡති සංතනුං,
එවං සරීරෙ නිබ්භොගෙ පෙතෙ කාලකතෙ සති.

86. ඩය්හමානො න ජානාති ඤාතීනං පරිදෙවිතං
තස්මා එතං න රොදාමි ගතො සො තස්ස යා ගතී’ති.

87. අනවහිතො තතො ආග නානුඤ්ඤතො ඉතො ගතො,
යථාගතො තථාගතො කා තත්ථ පරිදෙවනා.

88. ඩය්හමානො න ජානාති ඤාතීනං පරිදෙවිතං,
තස්මා එතං න රොදාමි ගතො සො තස්ස යා ගතී’ති.

89. සචෙ රොදෙ කිසා අස්සං තත්ථ මෙ කිං ඵලං සියා,
ඤාතිමිත්තසුහජ්ජානං භිය්යො නො අරතී සියා.

90. ඩය්හමානො න ජානාති ඤාතීනං පරිදෙවිතං
තස්මා එතං න රොදාමි ගතො සො තස්ස යා ගතී’ති.

91. යථාපි දාරකො චන්දං ගච්ඡන්තමනුරොදති,
එවං සම්පදමෙවෙතං යො පෙතමනුසොචති.

92. ඩය්හමානො න ජානාති ඤාතීනං පරිදෙවිතං,
තස්මා එතං න රොදාමි ගතො සො තස්ස යා ගතී’ති.

93. යථාපි බ්රහ්මෙ උදකුම්භො භින්නො අප්පටිසන්ධියො,
එවං සම්පදමෙවෙතං යො පෙතමනුසොචති.

94. ඩය්හමානො න ජානාති ඤාතිනං පරිදෙවිතං,
තස්මා එතං න රොදාමි ගතො සො තස්ස යා ගතී’ති.

ඛෙත්තඤ්ච සූකරං පූති පිට්ඨඤ්චාපි තිරොකුඩ්ඩං,
පඤ්චාපි සත්තපුත්තඤ්ච ගොණඤ්ච පෙසකාරකං,
තථා ඛල්ලාටියං නාගං උරගඤ්චෙව ද්වාදසාති.