58. කා නු අන්තොවිමානස්මිං තිට්ඨන්ති නූපනික්ඛමි,
උපනික්ඛමස්සු භද්දෙ ත්වං පස්සාම තං මහිද්ධික’න්ති.

59. අට්ටියාමි හරායාමි නග්ගා නික්ඛමිතුං බහි,
කෙසෙහම්හි පටිච්ඡන්නා පුඤ්ඤං මෙ අප්පකං කත’න්ති.

60. හන්දුත්තරීයං දදාමි තෙ ඉමං දුස්සං නිවාසය
ඉමං දුස්සං නිවාසෙත්වා බහි නික්ඛම සොභනෙ:
උපනික්ඛමස්සු භද්දෙ ත්වං පස්සාම තං බහිට්ඨිත’න්ති.

61. හත්ථෙන හත්ථෙ තෙ දින්නං න මය්හං උපකප්පති,
එසෙත්ථුපාසකො සද්ධො සම්මා සම්බුද්ධසාවකො.

62. එතං අච්ඡාදයිත්වාන මම දක්ඛිණමාදිස,
අථාහං සුඛිතා හෙස්සං සබ්බකාමසමිද්ධිනී’ති.

63. තං ච තෙ නහාපයිත්වාන විලිම්පිත්වාන වාණිජා,
වත්ථෙභච්ඡාදයිත්වාන තස්සා දක්ඛිණමාදිසුං.

64. සමන්තරා නුද්දිට්ඨෙ විපාකො උදපජ්ජථ,
භොජනච්ඡාදනපානීයං දක්ඛිණාය ඉදං ඵලං.

65. තතො සුද්ධා සුචිවසනා කාසිකුත්තමධාරිණී,
හසන්තී විමානා නික්ඛමි දක්ඛිණාය ඉදං ඵලන්ති’.

66. සුචිත්තරූපං රුචිරං විමානං තෙ පභාසති,
දෙවතෙ පුච්ඡිතාචික්ඛ කිස්ස කම්මස්සිදං ඵල’න්ති.

67. භික්ඛුනො චරමානස්ස දොණිනිම්මජ්ජනං අහං,
අදාසිං උජුභූතස්ස විප්පසන්නෙන චෙතසා

68. තස්ස කම්මස්ස කුසලස්ස විපාකං දීඝමන්තරං,
අනුභොමි විමානස්මිං තඤ්චෙදානි පරිත්තකං.

69. උද්ධං චතූහි මාසෙහි කාලකිරියා භවිස්සති,
එකන්තං කටුකං ඝොරං නිරයං පපතිස්සහං.

70. චතුක්කණ්ණං චතුද්වාරං විභත්තං භාගසො මිතං,
අයොපාකාරපරියන්තං අයසා පටිකුජ්ජිතං.

71. තස්ස අයොමයා භූමි ජලිතා තෙජසා යුතා,
සමන්තා යොජනසතං ඵරිත්වා තිට්ඨති සබ්බදා.

72. තත්ථාහං දීඝමද්ධානං දුක්ඛං වෙදිස්සං වෙදනං,
ඵලඤ්ච පාපකම්මස්ස තස්මා සොචාමහං භුස’න්ති.

73. පුරතොව සෙතෙන පලෙති හත්ථිනා
මජ්ඣෙ පන අස්සතරීරථෙන,
පච්ඡා ච කඤ්ඤා සිවිකාය නිය්යති
ඔභාසයන්ති දස සබ්බසො දිසා.

74. තුම්හෙ පන මුග්ගරහත්ථපාණිනො
රුදම්මුඛා භින්නපභින්නගත්තා,
මනුස්සභූතා කිමකත්ථ පාපං
යෙනඤ්ඤ මඤ්ඤස්ස පිවාථ ලොහිත’න්ති.

75. පුරතොව යො ගච්ඡති කුඤ්ජරෙන
සෙතෙන නාගෙන චතුක්කමෙන,
අම්හාක පුත්තො අහු ජෙට්ඨකො සො
දානානි දත්වාන සුඛී පමොදති.

76. යො සො මජ්ඣෙ අස්සතරී රථෙන
චතුබ්භි යුත්තෙන සුවග්ගිතෙන,
අම්හාක පුත්තො අහු මජ්ඣිමො සො
අමච්ඡරී දානපතී විරොචති.

77. යා සා ච පච්ඡා සිවිකා යනිය්යති
නාරී සපඤ්ඤා මිගමන්දලොචනා,
අම්හාක ධීතා අහු සා කනිට්ඨා
භාගඩ්ඪභාගෙන සුඛී පමොදති.

78. එතෙ ච දානානි අදංසු පුබ්බෙ
පසන්නචිත්තා සමණබ්රාහ්මණානං,
මයම්පන මච්ඡරිනො අහුම්හා
පරිභාසකා සමණබ්රාහ්මණානං.
එතෙ පදත්වා පරිචාරයන්ති
මයඤ්ච සුස්සාම නළොව ඛිත්තො’ති.