කතමං තථාගතස්ස යමකපාටිහීරෙ ඤාණං.

ඉධ තථාගතො යමකපාටිහීරං කරොති අසාධාරණං සාවකෙහි. උපරිමකායතො අග්ගික්ඛන්ධො පවත්තති, හෙට්ඨිමකායතො උදකධාරා පවත්තති; හෙට්ඨිමකායතො අග්ගික්ඛන්ධො පවත්තති, උපරිමකායතො උදකධාරා පවත්තති; පුරත්ථිමකායතො අග්ගික්ඛන්ධො පවත්තති, පච්ඡිමකායතො උදකධාරා පවත්තති; පච්ඡිමකායතො අග්ගික්ඛන්ධො පවත්තති, පුරත්ථිමකායතො උදකධාරා පවත්තති; දක්ඛිණක්ඛිතො අග්ගික්ඛන්ධො පවත්තති, වාමක්ඛිතො උදකධාරා පවත්තති; වාමක්ඛිතො අග්ගික්ඛන්ධො පවත්තති, දක්ඛිණක්ඛිතො උදකධාරා පවත්තති. දක්ඛිණකණ්ණසොතතො අග්ගික්ඛධො පවත්තති, වාමකණ්ණසොතතො උදකධාරා පවත්තති; වාමකණ්ණසොතතො අග්ගික්ඛන්ධො පවත්තති, දක්ඛිණකණ්ණසොතතො උදකධාරා පවත්තති, දක්ඛිණනාසිකාසොතතො අග්ගික්ඛන්ධො පවත්තති, වාමනාසිකාසොතතො උදකධාරා පවත්තති; වාමනාසිකාසොතතො අග්ගික්ඛන්ධො පවත්තති, දක්ඛිණනාසිකාසොතතො උදකධාරා පවත්තති; දක්ඛිණංසකූටතො අග්ගික්ඛන්ධො පවත්තති, වාමංසකූටතො උදකධාරා පවත්තති; වාමංසකූටතො අග්ගික්ඛන්ධො පවත්තති, දක්ඛිණංසකූටතො උදකධාරා පවත්තති; දක්ඛිණහත්ථතො අග්ගික්ඛන්ධො පවත්තති, වාමහත්ථතො උදකධාරා පවත්තති; වාමහත්ථතො අග්ගික්ඛන්ධො පවත්තති, දක්ඛිණහත්ථතො උදකධාරා පවත්තති; දක්ඛිණපස්සතො අග්ගික්ඛන්ධො පවත්තති, වාමපස්සතො උදකධාරා පවත්තති; වාමපස්සතො අග්ගික්ඛන්ධොපවත්තති, දක්ඛිණපස්සතො උදකධාරා පවත්තති; දක්ඛීණපාදතො අග්ගික්ඛන්ධො පවත්තති, වාමපාදතො උදකධාරා පවත්තති; වාමපාදතො අග්ගික්ඛන්ධො පවත්තති, දක්ඛිණපාදතො උදකධාරා පවත්තති, අඞ්ගුලඞ්ගුලෙහි අග්ගික්ඛන්ධො පවත්තති, අඞ්ගුලන්තරිකාහි උදකධාරා පවත්තති; අඞ්ගුලන්තරිකාහි අග්ගික්ඛන්ධො පවත්තති, අඞ්ගුලඞ්ගුලෙහි උදකධාරා පවත්තති; එකෙකලොමතො අග්ගික්ඛන්ධො පවත්තති, එකෙකලොමතො උදකධාරා පවත්තති, ලොමකූපතො ලොමකූපතො අග්ගික්ඛන්ධො පවත්තති, ලොමකූපතො ලොමකූපතො උදකධාරා පවත්තති, ඡන්නං වණ්ණානං නීලානං පීතකානං ලොහිතකානං ඔදාතානං මඤ්ජිට්ඨානං පභස්සරානං.

භගවා චඞ්කමති, නිම්මිතො තිට්ඨති වා නිසීදති වා සෙය්යං වා කප්පෙති. භගවා තිට්ඨති, නිම්මිතො චඞ්කමති වා නිසීදති වා සෙය්යං වා කප්පෙති; භගවා නිසීදති, නිම්මිතො චඞ්කමති වා තිට්ඨති ච නිසීදති වා; නිම්මිතො චඞ්කමති, භගවා තිට්ඨති වා නිසීදති වා සෙය්යං වා කප්පෙති; නිම්මිතො තිට්ඨති, භගවා චඞ්කමති වා නිසීදති වා සෙය්යං වා කප්පෙති; නිම්මිතො නිසීදති, භගවා චඞ්කමති වා නිසීදති වා සෙය්යං වා කප්පෙති; නිම්මිතො සෙය්යං කප්පෙති, භගවා චඞ්කමති වා තිට්ඨති වා නිසීදති වාති’.

ඉදං තථාගතස්ස යමකපාටිහීරෙ ඤාණං.

කතමං තථාගතස්ස මහාකරුණාසමාත්තියා ඤාණං:

බහුකෙහි ආකාරෙහි පස්සන්තානං බුද්ධානං භගවන්තානං සත්තෙසු මහාකරුණා ඔක්කමති: ‘ආදිත්තො ලොකසන්නිවාසො’ති පස්සන්තානං බුද්ධානං භගවන්තානං සත්තෙසු මහාකරුණා ඔක්කමති. ‘උය්යුත්තො ලොකසන්නිවාසො’ති පස්සන්තානං බුද්ධානං භගවන්තානං සත්තෙසු මහාකරුණා ඔක්කමති. ‘පයාතො ලොකසන්නිවාසො’ති පස්සන්තානං බුද්ධානං භගවන්තානං සත්තෙසු මහාකරුණා ඔක්කමති. ‘කුම්මග්ගපටිපන්නො. ‘ලොකසන්නිවාසො’ති පස්සන්තානං බුද්ධානං භගවන්තානං සත්තෙසු මහාකරුණා ඔක්කමති. ‘උපනීයති ලොකො අද්ධුවො’ති පස්සන්තානං බුද්ධානං භගවන්තානං සත්තෙසු මහාකරුණා ඔක්කමති, ‘අතාණො ලොකො අනභිස්සරො’ති පස්සන්තායං බුද්ධානං භගවන්තානං සත්තෙසු මහාකරුණා ඔක්කමති. ‘අස්සකො ලොකො සබ්බං පහාය ගමනීය’න්ති පස්සන්තානං බුද්ධානං භගවන්තානං සත්තෙසු මහාකරුණා ඔක්කමති. ‘ඌනො ලොකො අතිත්තො තණ්හාදාසො’ති පස්සන්තානං බුද්ධානං භගවන්තානං සත්තෙසු මහාකරුණා ඔක්කමති. ‘අතායනො ලොකසන්නිවාසො’ති පස්සන්තානං -පෙ- ‘අලෙණො ලොකසන්නිවාසො’ති පස්සන්තානං -පෙ- ‘අසරණො ලොකසන්නිවාසො’ති පස්සන්තානං -පෙ- ‘අසරණීභූතො ලොකසන්නිවාසො’ති පස්සන්තානං -පෙ-

‘උද්ධතො ලොකො අවුපසන්තො’ති පස්සන්තානං -පෙ- ‘සසල්ලො ලොකසන්නිවාසෙ විද්ධො පුථුසල්ලෙහි, තස්ස නත්ථඤ්ඤො කොචි සල්ලානං උද්ධාතා අඤ්ඤත්ර මයා’ති පස්සන්තානං -පෙ- ‘අවිජ්ජන්ධකාරාවරණො ලොකසන්නිවාසො කිලෙසපඤ්ජරපක්ඛිත්තො, තස්ස නත්ථඤ්ඤො කොචි ආලොකං දස්සෙතා අඤ්ඤත්ර මයා’ති පස්සන්තානං -පෙ- ‘අවිජ්ජාගතො ලොකසන්නිවාසො අණ්ඩභූතො පරියොනද්ධො තන්තාකුලකජාතො ගුලාගුණ්ඨිකජාතො මුඤ්ජබබ්බජභූතො අපායං දුග්ගතිං විනිපාතං සංසාරං නාතිවත්තතී’ති පස්සන්තානං -පෙ- ‘අවිජ්ජාවිසදොසසංලිත්තො ලොකසන්නිවාසො කිලෙසකලලීභූතො’ති පස්සන්තානං -පෙ-

‘රාගදොසමොහජටාජටිතො ලොකසන්නිවාසො, තස්ස නත්ථඤ්ඤො කොචි ජටං විජටෙතා අඤ්ඤත්ර මයා’ති පස්සන්තානං -පෙ- ‘තණ්හා සඞ්ඝාටපටිමුක්කො ලොකසන්නිවාසො’ති පස්සන්තානං -පෙ- ‘තණ්හාජාලෙන ඔත්ථටො ලොකසන්නිවාසො’ති පස්සන්තානං -පෙ- ‘තණ්හාසො තෙන වුය්හති ලොකසන්නිවාසො’ති පස්සන්තානං -පෙ- ‘තණ්හාසංයොජනෙන සඤ්ඤුත්තො ලොකසන්නිවාසො’ති පස්සන්තානං -පෙ- ‘තණ්හානුසයෙන අනුසටො ලොකසන්නිවාසො’ති පස්සන්තානං -පෙ- ‘තණ්හාසන්තාපෙන සන්තප්පති ලොකසන්නිවාසො’ති පස්සන්තානං -පෙ- තණ්හාපරිළාහෙන පරිඩය්හති ලොසන්නිවාසො’ති පස්සන්තානං -පෙ-