එතාභිනන්දාමි වචො මහෙසිනොති: එත’න්ති: තුය්හං වචනං බ්යප්පථං දෙසනා අනුසිට්ඨිං අභිනන්දාමීති නන්දාමි අභිනන්දාමි මොදාමි අනුමොදාමි ඉච්ඡාමි සාදියාමි පත්ථයාමි පිහයාමි අභිජප්පාමි. මහෙසිනොති මහෙසි භගවා: මහන්තං සීලක්ඛන්ධං. එසි ගවෙසි පරියෙසීති මහෙසි -පෙ- ‘කහං නරාසභො’ති මහෙසීති ‘එතාභිනන්දාමි වචො මහෙසිනො’

සුකිත්තිතං ගොතම නූපධීකන්ති ‘සුකිත්තිත’න්ති සුකිත්තිතං සු ආචික්ඛිතං සුදෙසිතං සුපඤ්ඤපිතං සුපට්ඨපිතං සුවිවරිතං සුවිභජිතං සුඋත්තානීකතං සුපකාසිතන්ති ‘සුකිත්තිතං’.

ගොතම නූපධීකන්ති උපධී වුච්චන්ති කිලෙසා ච ඛන්ධා ච අභිසඞ්ඛාරා ච. උපධිපහානං උපධිවුපසමං උපධිපටිනිස්සග්ගං උපධිපටිප්පස්සද්ධිං අමතං නිබ්බානන්ති ‘සුකිත්තිතං ගොතමනූපධීකං’.

අද්ධා හි භගවා පහාසි දුක්ඛන්ති’ ‘අද්ධා’ති එකංසවචනං නිස්සංසයවචනං නික්කඞ්ඛාවචනං අද්වෙජ්ඣවචනං අද්වෙළ්හකවචනං නියොගවචනං අපන්නකවචනං අවත්ථානවචනමෙතං ‘අද්ධා’ති භගවාති ගාරවාධිවචනං -පෙ- සච්ඡිකාපඤ්ඤත්ති යදිදං ‘භගවා’ති. පහාසි දුක්ඛන්ති ජාතිදුක්ඛං ජරාදුක්ඛං ව්යාධිදුක්ඛං මරණදුක්ඛං සොකපරිදෙවදුක්ඛදොමනස්සුපායාසදුක්ඛං පහාසි පජහි විනොදෙසි බ්යන්තීකරොසි අනභාවං ගමෙසීති ‘අද්ධා හි භගවා පහාසි දුක්ඛං’.

තථා හි තෙ විදිතො එස ධම්මොති තථා හි තෙ විදිතො තුලිතො තීරිතො විභූතො විභාවිතො එස ධම්මො ති ‘තථා හි තෙ විදිතො එස ධම්මො’.

තෙ චාපි නූන පජහෙය්යු දුක්ඛන්ති: ‘තෙචාපී’ති: ඛත්තියා ච බ්රාහ්මණා ච වෙස්සා ච සුද්දා ච ගහට්ඨා ච පබ්බජිතා ච දෙවා ච මනුස්සා ච. පජහෙය්යු දුක්ඛන්ති ජාතිදුක්ඛං ජරාදුක්ඛං ව්යාධිදුක්ඛං මරණදුක්ඛං සොකපරිදෙවදුක්ඛදොමනස්සුපායාසදුක්ඛං පජහෙය්යුං විනොදෙය්යුං බ්යන්තීකරෙය්යුං අනභාවං ගමෙය්යුන්ති ‘තෙ චාපි නූන පජහෙය්යු දුක්ඛං’.