නානා ජනා ජනපදෙහි සඞ්ගතාති: ‘නානා ජනා’ති: ඛත්තියා ච බ්රාහ්මණා ච වෙස්සා ච සුද්දා ච ගහට්ඨා ච පබ්බජිතා ච දෙවා ච මනුස්සා ච. ජනපදෙහි සඞ්ගතාති: අඞ්ගා ච මගධා ච කලිඞ්ගා ච කාසියා ච කොසලා ච වජ්ජියා ච මල්ලා ච චෙතියම්හා ච වංසා ච කුරුම්හා ච පඤ්චාලා ච මච්ඡා ච සූරසෙනා ච අස්සකා ච අවන්තියා ච යොනා ච කම්බොජා ච. සඞ්ගතාති: සඞ්ගතා සමාගතා සමොහිතා සන්නිපතිතාති ‘නානා ජනා ජනපදෙහි සඞ්ගතා.’

තව වීර වාක්යං අභිකඞ්ඛමානාති: ‘වීරා’ති වීරො භගවා, විරියවා සොති වීරො, පහූති වීරො, විසවීති වීරො, අලමත්තොති වීරො -පෙ- විගතලොමහංසොති වීරො.

තව වීර වාක්යං අභිකඞ්ඛමානාති: තුය්හං වචනං බ්යප්පථං දෙසනං අනුසිට්ඨිං. අභිකඞ්ඛමානාති: අභිකඞ්ඛමානා ඉච්ඡමානා සාදියමානා පත්ථයමානා පිහයමානා අභිජප්පමානාති ‘තව වීර වාක්යං අභිකඞ්ඛමානා. ‘

තෙසං තුවං සාධු වියාකරොහීති: ‘තෙස’න්ති තෙසං ඛත්තියානං බ්රාහ්මණානං වෙස්සානං සුද්දානං ගහට්ඨානං පබ්බජිතානං දෙවානං මනුස්සානං. තුවන්ති: භගවන්තං භණති. සාධු වියාකරොහීති: සාධු ආචික්ඛාහි දෙසෙහි පඤ්ඤපෙහි පට්ඨපෙහි විවරාහි විභජාහි උත්තානීකරොහි පකාසෙහීති ‘තෙසං තුවං සාධු වියාකරොහි.’

තථා හි තෙ විදිතො එස ධම්මොති: ‘තථා හි තෙ විදිතො තුලිතො තීරිතො විභූතො විභාවිතො එස ධම්මොති ‘තථා හි තෙ විදිතො එස ධම්මො.’

ආදානතණ්හං විනයෙථ සබ්බන්ති: ‘ආදානතණ්හා වුච්චති රූපතණ්හා -පෙ- ආදානතණ්හාති කිං කාරණා වුච්චති ආදානතණ්හා: තාය තණ්හාය රූපං ආදියන්ති උපාදියන්ති ගණ්හන්ති පරාමසන්ති අභිනිවිසන්ති, වෙදනං-සඤ්ඤං-සංඛාරෙ-විඤ්ඤාණං-ගතිං-උප්පත්තිං-පටිසන්ධිං-භවං-සංසාරං-වට්ටං-ආදියන්ති උපාදියන්ති ගණ්හන්ති පරාමසන්ති අභිනිවිසන්ති තංකාරණා වුච්චති ආදානතණ්හා. විනයෙථ සබ්බන්ති: සබ්බං ආදානතණ්හං විනයෙය්ය පටිවිනෙය්ය පජහෙය්ය විනොදෙය්ය බ්යන්තීකරෙය්ය අනභාවං ගමෙය්යාති ‘ආදානතණ්හං විනයෙථ සබ්බං. භද්රාවුධා’ති භගවා -පෙ-

උද්ධං අධො තිරියඤ්චාපි මජ්ඣෙති: ‘උද්ධං’ වුච්චති අනාගතං, අධො වුච්චති අතීතං, තිරියං චාපි මජ්ඣෙති පච්චුප්පන්නං. උද්ධන්ති දෙවලොකො, අධොති නිරයලොකො, තිරියඤ්චාපි මජ්ඣෙති මනුස්සා ලොකො. උද්ධන්ති කුසලා ධම්මා, අධොති අකුසලා ධම්මා, තිරියඤ්චාපි මජ්ඣෙති අව්යාකතා ධම්මා, උද්ධන්ති සුඛා වෙදනා, අධොති දුක්ඛා වෙදනා තිරියඤ්චාපි මජ්ඣෙති අදුක්ඛමසුඛා වෙදනා. උද්ධන්ති අරූපධාතු අධොති කාමධාතු, තිරියඤ්චාපි මජ්ඣෙති රූපධාතු. උද්ධන්ති උද්ධං පාදතලා, අධොති අධො කෙසමත්ථකා, තිරියඤ්චාපි මජ්ඣෙති වෙමජ්ඣෙති ‘උද්ධං අධො තිරියඤ්චාපි මජ්ඣෙ.’