4-1 පුච්ඡාමි තං භගවා බ්රූහි මෙතං (ඉච්චායස්මා මෙත්තගූ)
මඤ්ඤාමි තං වෙදගුං භාවිතත්තං
කුතොනු දුක්ඛා සමුදාගතා ඉමෙ
යෙ කෙචි ලොකස්මිං අනෙකරූපා.

4-2 දුක්ඛස්ස වෙ මං පභවං අපුච්ඡසි (මෙත්තගූ’ති භගවා)
තං තෙ පවක්ඛාමි යථා පජානං
උපධිනිදානා පභවන්ති දුක්ඛා
යෙ කෙචි ලොකස්මිං අනෙකරූපා.

4-3 යො වෙ අවිද්වා උපධිං කරොති
පුනප්පුනං දුක්ඛමුපෙති මන්දො
තස්මා පජානං උපධිං න කයිරා
දුක්ඛස්ස ජාතිප්පභවානුපස්සී.

4-4 යන්තං අපුච්ඡිම්හ අකිත්තයී නො (ඉච්චායස්මා මෙත්තගූ)
අඤ්ඤං තං පුච්ඡාම තදිඞ්ඝ බ්රූහි
කථන්නු ධීරා විතරන්ති ඔඝං
ජාති ජරං සොකපරිද්දවං ච
තං මෙ මුනී සාධු වියාකරොහි
තථා හි තෙ විදිතො එස ධම්මො.

4-5 කිත්තයිස්සාමි තෙ ධම්මං (මෙත්තගූති භගවා)
දිට්ඨෙ ධම්මෙ අනීතිහං
යං විදිත්වා සතො චරං
තරෙ ලොකෙ විසත්තිකං.

4-6 තං චාහං අභිනන්දාමි
මහෙසී ධම්මමුත්තමං
යං විදිත්වා සතො චරං
තරෙ ලොකෙ විසත්තිකං.

4-7 යං කිඤ්චි සම්පජානාසි (මෙත්තගූ’ති භගවා)
උද්ධං අධො තිරියං චාපි මජ්ඣෙ
එතෙසු නන්දිං ච නිවෙසනං ච
පනුජ්ජ විඤ්ඤාණං භවෙ න තිට්ඨෙ.

4-8 එවංවිහාරී සතො අප්පමත්තො
භික්ඛු චරං හිත්වා මමායිතානි
ජාතිං ජරං සොකපරිද්දවඤ්ච
ඉධෙව විද්වා පජහෙය්ය දුක්ඛං.

4-9 එතාභිනන්දාමි වචො මහෙසිනො (ඉච්චායස්මා මෙත්තගූ)
සුකිත්තිතං ගොතම නූපධීකං
අද්ධා හි භගවා පහාසි දුක්ඛං
තථා හි තෙ විදිතො එස ධම්මො.

4-10 තෙ චාපි නූන පජහෙය්යු දුක්ඛං
යෙ ත්වං මුනී අට්ඨිතං ඔවදෙය්ය
තං තං නමස්සාමි සමෙච්ච නාග
අප්පෙව මං (භගවා) අට්ඨිතං ඔවදෙය්ය.

4-11 යං බ්රාහ්මණං වෙදගුං ආභිජඤ්ඤා (මෙත්තගූ’ති භගවා)
අකිඤ්චනං කාමභවෙ අසත්තං
අද්ධා හි සො ඔඝමිමං අතාරී
තිණ්ණො ච පාරං අඛිලො අකඞ්ඛො.

4-12 විද්වා ච යො වෙදගූ නරො ඉධ
භවාභවෙ සඞ්ගමිමං විසජ්ජ
සො වීතතණ්හො අනීඝො නිරාසො
අතාරි සො ජාතිජරන්ති බ්රූමී ති.