14-1 යො අතීතං ආදිසති (ඉච්චායස්මා පොසාලො)
අනෙජො ඡින්නසංසයො
පාරගුං සබ්බධම්මානං
අත්ථි පඤ්හෙන ආගමං.

14-2 විභූතරූපසඤ්ඤිස්ස
සබ්බකායප්පහායිනො
අජ්ඣත්තං ච බහිද්ධා ච
නත්ථි කිඤ්චීති පස්සතො
ඤාණං සක්කානු පුච්ඡාමි
කථං නෙය්යො තථාවිධො.

14-3 විඤ්ඤාණට්ඨිතියො සබ්බා (පොසාලාති භගවා)
අභිජානං තථාගතො
තිට්ඨන්තමෙනං ජානාති
ධිමුත්තං තප්පරායණං.

14-4 ආකිඤ්චඤ්ඤා සම්භවං ඤත්වා
නන්දි සංයොජනං ඉති
එවමෙතං අභිඤ්ඤාය
තතො තත්ථ විපස්සති
එතං ඤාණං තථා තස්ස
බ්රාහ්මණස්ස වුසීමතො’ති.

15-1 ද්වාහං සක්කං අපුච්ඡිස්සං (ඉච්චායස්මා මොඝරාජා)
න මෙ ව්යාකාසි චක්ඛුමා
යාව තතියං ච දෙවීසි
ව්යාකරොතීති මෙ සුතං.

15-2 අයං ලොකො පරො ලොකො
බ්රහ්මලොකො සදෙවකො
දිට්ඨින්තෙ නාභිජානාති
ගොතමස්ස යසස්සිනො.

15-3 එවං අභික්කන්තදස්සාවිං
අත්ථි පඤ්හෙන ආගමං
කථං ලොකං අවෙක්ඛන්තං
මච්චුරාජා න පස්සති.

15-4 සුඤ්ඤතො ලොකං අවෙක්ඛස්සු
මොඝරාජ සදා සතො
අත්තානුදිට්ඨිං ඌහච්ච
එවං මච්චුතරො සියා
එවං ලොකං අවෙක්ඛන්තං
මච්චුරාජා න පස්සතීති.

16-1 ජිණ්ණො’හමස්මි අබලො වීතවණ්ණො (ඉච්චායස්මා පිඞ්ගියො)
නෙත්තා න සුද්ධා සවණං න ඵාසු
මාහං නස්සං මොමුහො අන්තරා’ව
ආචික්ඛ ධම්මං යමහං විජඤ්ඤං
ජාතිජරාය ඉධ විප්පහානං.

16-2 දිස්වාන රූපෙසු විහඤ්ඤමානෙ (පිඞ්ගියාති භගවා)
රුප්පන්ති රූපෙසු ජනා පමත්තා
තස්මා තුවං පිඞ්ගිය අප්පමත්තො
ජහස්සු රූපං අපුනබ්භවාය.