1-1 කෙනස්සු නිවුතො ලොකො (ඉච්චායස්මා අජිතො)
කෙනස්සු නප්පකාසති
කිස්සාභිලෙපනං බ්රූහි
කිං සු තස්ස මහබ්භයං.

1-2 අවිජ්ජාය නිවුතො ලොකො (අජිතාති භගවා)
වෙවිච්ඡා පමාදා නප්පකාසති
ජප්පාභිලෙපනං බ්රූමි
දුක්ඛමස්ස මහබ්භයං.

1-3 සවන්ති සබ්බධි සොතා (ඉච්චායස්මා අජිතො)
සොතානං කිං නිවාරණං
සොතානං සංවරං බ්රූහි
කෙන සොතා පිථියරෙ.

1-4 යානි සොතානි ලොකස්මිං (අජිතාති භගවා)
සති තෙසං නිවාරණං
සොතානං සංවරං බ්රූමි
පඤ්ඤායෙතෙ පිථියරෙ.

1-5 පඤ්ඤා චෙව සතී චාපි (ඉච්චායස්මා අජිතො)
නාමරූපං ච මාරිස
එතං මෙ පුට්ඨො පබ්රූහි
කත්ථෙතං උපරුජ්ඣති.

1-6 යමෙතං පඤ්හං අපුච්ඡි
අජිත තං වදාමි තෙ
යත්ථ නාමං ච රූපං ච
අසෙසං උපරුජ්ඣති
විඤ්ඤාණස්ස නිරොධෙන
එත්ථෙතං උපරුජ්ඣති.

1-7 යෙ ච සඞ්ඛාතධම්මා සෙ
යෙ ච සෙඛා පුථූ ඉධ
තෙසං මෙ නිපකො ඉරියං
පුට්ඨො පබ්රූහි මාරිස.

1-8 කාමෙසු නාභිගිජ්ඣෙය්ය
මනසා නාවිලො සියා
කුසලො සබ්බ ධම්මානං
සතො භික්ඛු පරිබ්බජෙ.

2-1 කො’ධ සන්තුසිතො ලොකෙ (ඉච්චායස්මා තිස්ස මෙත්තෙය්යො)
කස්ස නො සන්ති ඉංජිතා
කො උභන්තමභිඤ්ඤාය
මජ්ඣෙමන්තා න ලිප්පති
කං බ්රූසි මහාපුරිසො’ති
කො’ධ සිබ්බනිමච්චගා?

2-2 කාමෙසු බ්රහ්මචරියවා (මෙත්තෙය්යා’ති භගවා)
වීතතණ්හො සදා සතො
සඞ්ඛාය නිබ්බුතො භික්ඛු
තස්ස නො සන්ති ඉඤ්ජිතා.

2-3 සො උභන්තමභිඤ්ඤාය
මජ්ඣෙ මන්තා න ලිප්පති
තං බ්රූමි මහා පුරිසො’ති
සො’ධ සිබ්බනිමච්චගා.

3-1 අනෙජං මූලදස්සාවිං (ඉච්චායස්මා පුණ්ණකො)
අත්ථි පඤ්හෙන ආගමං
කිංනිස්සිතා ඉසයො මනුජා
ඛත්තියා බ්රාහ්මණා දෙවතානං
යඤ්ඤමකප්පයිංසු පුථු ඉධ ලොකෙ
පුච්ඡාමි තං භගවා බ්රූහි මෙතං.