4. කුමාරපඤ්හා
එකං නාම කිං? සබ්බෙ සත්තා ආහාරට්ඨිතිකා.
ද්වෙ නාම කිං? නාමඤ්ච රූපඤ්ච.
තීණි නාම කිං? තිස්සො වෙදනා.
චත්තාරි නාම කිං? චත්තාරි අරියසච්චානි.
පඤ්ච නාම කිං? පඤ්චුපාදානක්ඛන්ධා.
ඡ නාම කිං? ඡ අජ්ඣත්තිකානි ආයතනානි.
සත්ත නාම කිං? සත්ත බොජ්ඣඞ්ගා.
අට්ඨ නාම කිං? අරියො අට්ඨඞ්ගිකො මග්ගො.
නව නාම කිං? නව සත්තාවාසා.
දස නාම කිං? දසහඞ්ගෙහි සමන්නාගතො අරහා’ති වුච්චතීති.
කුමාරපඤ්හා.
5. මඞ්ගලසුත්තං
එවං මෙ සුත: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො අඤ්ඤතරා දෙවතා අභික්කන්තාය රත්තියා අභික්කන්තවණ්ණා කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතා ඛො සා දෙවතා භගවන්තං ගාථාය අජ්ඣභාසි.
1. බහූ දෙවා මනුස්සා ච මඞ්ගලානි අචින්තයුං,
ආකඞ්ඛමානා සොත්ථානං බ්රූහි මඞ්ගලමුත්තමං.
ආකඞ්ඛමානා සොත්ථානං බ්රූහි මඞ්ගලමුත්තමං.
2. අසෙවනා ච බාලානං පණ්ඩිතානං ච සෙවනා,
පූජා ච පූජනීයානං එතං මඞ්ගලමුත්තමං.
පූජා ච පූජනීයානං එතං මඞ්ගලමුත්තමං.
3. පතිරූපදෙසවාසො ච පුබ්බෙ ච කතපුඤ්ඤතා
අත්තසම්මාපණිධි ච එතං මඞ්ගලමුත්තමං.
අත්තසම්මාපණිධි ච එතං මඞ්ගලමුත්තමං.
4. බාහුසච්චඤ්ච සිප්පඤ්ච විනයො ච සුසික්ඛිතො
සුභාසිතා ච යා වාචා එතං මඞ්ගලමුත්තමං.
සුභාසිතා ච යා වාචා එතං මඞ්ගලමුත්තමං.
5. මාතාපිතුඋපට්ඨානං පුත්තදාරස්ස සඞ්ගහො
අනාකුලා ච කම්මන්තා එතං මඞ්ගලමුත්තමං.
අනාකුලා ච කම්මන්තා එතං මඞ්ගලමුත්තමං.
6. දානං ච ධම්මචරියා ච ඤාතකානඤ්ච සඞ්ගහො
අනවජ්ජානි කම්මානි එතං මඞ්ගලමුත්තමං.
අනවජ්ජානි කම්මානි එතං මඞ්ගලමුත්තමං.
7. ආරති විරති පාපා මජ්ජපානා ච සඤ්ඤමො
අප්පමාදො ච ධම්මෙසූ එතං මඞ්ගලමුත්තමං.
අප්පමාදො ච ධම්මෙසූ එතං මඞ්ගලමුත්තමං.
8. ගාරවො ච නිවාතො ච සන්තුට්ඨි ච කතඤ්ඤුතා
කාලෙන ධම්මසවණං එතං මඞ්ගලමුත්තමං.
කාලෙන ධම්මසවණං එතං මඞ්ගලමුත්තමං.
9. ඛන්තී ච සොවචස්සතා සමණානඤ්ච දස්සනං
කාලෙන ධම්මසාකච්ඡා එතං මඞ්ගලමුත්තමං.
කාලෙන ධම්මසාකච්ඡා එතං මඞ්ගලමුත්තමං.
10. තපො ච බ්රහ්මචරියඤ්ච අරියසච්චානදස්සනං
නිබ්බාණසච්ඡිකිරියා ච එතං මඞ්ගලමුත්තමං.
නිබ්බාණසච්ඡිකිරියා ච එතං මඞ්ගලමුත්තමං.