777. හිරිං තරන්තං විජිගුච්ඡමානං
තවාහමස්මිං ඉති භාසමානං,
සෙය්යානි කම්මානි අනාදියන්තං.
නෙසො මමන්ති ඉති තං විජඤ්ඤා.

778. යං හි කයිරා තං හි වදෙ යං න කයිරා න තං වදෙ,
අකරොන්තං භාසමානං පරිජානන්ති පණ්ඩිතා.

779. න සො මිත්තො යො සදා අප්පමත්තො
භෙදාසඞ්කි රන්ධමෙවානුපස්සී,
යස්මිඤ්ච සෙති උරසීව පුත්තො
ස වෙ මිත්තො යො අභෙජ්ජො පරෙහි.

780. පාමොජ්ජකරණං ඨානං පසංසාවහනං සුඛං.
ඵලානිසංසො භාවෙති වහන්තො පොරිසං ධුරං.

781. පවිවෙකරසං පීත්වා රසං උපසමස්ස ච,
නිද්දරො හොති නිප්පාපො ධම්මපීතිරසං පිව’න්ති.

782. කො නු සන්තම්හි පජ්ජොතෙ අග්ගිපරියෙසනං චරං,
අද්දක්ඛි රත්තිං ඛජ්ජොතං ජාතවෙදං අමඤ්ඤථ.

783. ස්වාස්ස ගොමයචුණ්ණානි අභිමත්ථං තිණානි ච,
විපරීතාය සඤ්ඤාය නාසක්ඛි පජ්ජලෙතවෙ.

784. එවම්පි අනුපායෙන අත්ථං න ලභතෙ මගො,
විසාණතො ගවං දොහං යත්ථ ඛීරං න වින්දති.

785. විවිධෙහි උපායෙහි අත්ථං පප්පොන්ති මාණවා,
නිග්ගහෙන අමිත්තානං මිත්තානං පග්ගහෙන ච.

786. සෙණිමොක්ඛො පලාභෙන වල්ලභානං නයෙන ච,
ජගතිං ජගතීපාලා ආවසන්ති වසුන්ධරන්ති.

787. ධුත්තොම්භි සම්ම සුමුඛ ජූතෙ අක්ඛපරාජිතො,
හරෙහි අම්බපක්කානි විරියන්තෙ භක්ඛයාමසෙ.

788. අලිකං වත මං සම්ම අභූතෙන පසංසසි,
කො තෙ සුතො වා දිට්ඨො වා සුමුඛො නාම මක්කටො.

789. අජ්ජාපි මෙ ත්වං මනසි යං මං ත්වං අහිතුණ්ඩික,
ධඤ්ඤාපණං පවිසිත්වා මත්තො ඡාතං හනාසි මං.

790. තාහං සරං දුක්ඛසෙය්යං අපි රජ්ජම්පි කාරයෙ,
නෙවාහං යාචිතො දජ්ජං තථා හි භයතජ්ජිතො.

791. යඤ්ච ජඤ්ඤා කුලෙජාතං ගබ්භෙ තිත්තං අමච්ඡරිං,
තෙන සඛිඤ්ච මිත්තඤ්ච ධීරො සන්ධාතුමරහතී’ති.

792. මධුවණ්ණං මධුරසං මධුගන්ධං විසං අහූ,
ගුම්බියො ඝාසමෙසානො අරඤ්ඤෙ ඔදහී විසං.

793. මධු ඉති මඤ්ඤමානා යෙ තං විසමසායිසුං,
තෙසං තං කටුකං ආසි මරණං තෙනුපාගමුං.

794. යෙ ච ඛො පටිසඞ්ඛාය විසං තං පරිවජ්ජයුං,
තෙ ආතුරෙසු සුඛිතා ඩය්හමානෙසු නිබ්බුතා.

795. එවමෙව මනුස්සෙසු විසං කාමා සමොහිතා,
ආමිසං බන්ධනං චෙතං මච්චුවසො ගුහාසයො.

796. එවමෙව ඉමෙ කාමෙ ආතුරා පරිචාරකෙ,
යෙ සදා පරිවජ්ජෙන්ති සඞ්ගං ලොකෙ උපච්චගුන්ති.