696. අරඤ්ඤා ගාමමාගම්ම කිං සීලං කිං වතං අහං,
පුරිසං තාත සෙවෙය්යං තං මෙ අක්ඛාහි පුච්ඡිතො.

697. යො තං විස්සාසයෙ තාත විස්සාසඤ්ච ඛමෙය්ය තෙ,
සුස්සූසී ච තිතික්ඛී ච තං භජෙහි ඉතො ගතො.

698. යස්ස කායෙන වාචාය මනසා නත්ථි දුක්කටං,
ඔරසිව පතිට්ඨාය තං භජෙහි ඉතො ගතො.

699. හළිද්දරාගං කපිචිත්තං පුරිසං රාගවිරාගිනං,
තාදිසං තාත මා සෙවි නිම්මනුස්සම්පි චෙ සියා’ති.

700. නෙව ඉත්ථිසු සාමඤ්ඤං නපි භක්ඛෙසු සාරථි,
අථස්ස සන්ධිභෙදස්ස පස්ස යාව සුචින්තිතං.

701. අසි තික්ඛොව මංසම්හි පෙසුඤ්ඤං පරිවත්තති,
යත්ථුසභඤ්ච සීහඤ්ච භක්ඛයන්ති මිගාධමා.

702. ඉමං සො සයනං සෙති යයිමං පස්සසි සාරථි,
යො වාචං සන්ධිභෙදස්ස පිසුනස්ස නිබොධති.

703. තෙ ජනා සුඛමෙධන්ති නරා සග්ගගතාරිව,
යො වාචං සන්ධිභෙදස්ස නාවබොධෙන්ති සාරථි’ති.

704. හන්ති හත්ථෙහි පාදෙහි මුඛඤ්ච පරිසුම්භති,
ස වෙ රාජ පියො හොති කං තෙනමභිපස්සසි.

705. අක්කොසති යථාකාමං ආගමඤ්චස්ස න ඉච්ඡති,
ස චෙ රාජ පියො හොති කං තෙනම්භිපස්සසි.

706. අබ්භක්ඛාති අභූතෙන අලිකෙනමභිසාරයෙ,
ස වෙ රාජ පියො හොති කං තෙනමභිපස්සසි.

707. හරං අන්නඤ්ච පානඤ්ච වත්ථසෙනාසනානි ච,
අඤ්ඤදත්ථු හරා සන්තා තෙ වෙ රාජ පියා හොන්ති,
කං තෙන මභිපස්සසීති.

නරානං අසක්ඛිවසිම්භවරො
නීලියමග්ගිවරඤ්ච පුන,
පුන රසායසකූටවරො
තථාරඤ්ඤසාරථි හන්ති දස.

විවරං පුචිමන්දඤ්ච
කුටිදූසං බහුහාණකං,
චූළකුණාලවග්ගො සො
පඤ්චමො සුප්පකාසිතොති.