688. මනුස්සින්දං ජහිත්වාන සබ්බකාමසමිද්ධිනං,
කථං නු භගවා කෙසි කප්පස්ස රමති අස්සමෙ.

689. සාධුනි රමණීයානි සන්ති වක්ඛා මනොරමා,
සුභාසිතානි කප්පස්ස නාරද රමයන්ති මං.

690. සාලීනං ඔදනං භුඤ්ජෙ සුචිමංසූපසෙචනං,
කථං සාමාකනීවාරං අලොණං ඡාදයන්ති තං.

691. අසාදුං යදි වා සාදුං අප්පං වායදි වා බහුං,
විස්සත්ථො යත්ථ භුඤ්ජෙය්ය විස්සාසපරමා රසාති.

692. සබ්බායසං කූටමතිප්පමාණං
පග්ගය්හ සො තිට්ඨති අන්තලික්ඛෙ,
රක්ඛාය මෙ ත්වං විහිතො නුසජ්ජ
උදාහු මෙ වායමසෙ වධාය.

693. දූතො අහං රාජිධ රක්ඛසානං.
වධාය තුය්හං පහිතොහමස්මි,
ඉන්දො ච තං රක්ඛති දෙවරාජා
තෙනුත්තමඞ්ගං න තෙ ඵාලයාමි.

694. සචෙ ච මං රක්ඛති දෙවරාජා
දෙවානමින්දො මඝවා සුජම්පති,
කාමං පිසාචා කන්දන්තු සබ්බෙ
න සන්තසෙ රක්ඛසියා පජාය.

695. කාමං නන්දන්තු කුම්භණ්ඩා සබ්බෙපංසුපිසාචකා,
නාලං පිසාචා යුද්ධාය මහතී සා විභිංසිකාති.

696. අරඤ්ඤා ගාමමාගම්ම කිං සීලං කිං වතං අහං,
පුරිසං තාත සෙවෙය්යං තං මෙ අක්ඛාහි පුච්ඡිතො.

697. යො තං විස්සාසයෙ තාත විස්සාසඤ්ච ඛමෙය්ය තෙ,
සුස්සූසී ච තිතික්ඛී ච තං භජෙහි ඉතො ගතො.

698. යස්ස කායෙන වාචාය මනසා නත්ථි දුක්කටං,
ඔරසිව පතිට්ඨාය තං භජෙහි ඉතො ගතො.

699. හළිද්දරාගං කපිචිත්තං පුරිසං රාගවිරාගිනං,
තාදිසං තාත මා සෙවි නිම්මනුස්සම්පි චෙ සියා’ති.

700. නෙව ඉත්ථිසු සාමඤ්ඤං නපි භක්ඛෙසු සාරථි,
අථස්ස සන්ධිභෙදස්ස පස්ස යාව සුචින්තිතං.

701. අසි තික්ඛොව මංසම්හි පෙසුඤ්ඤං පරිවත්තති,
යත්ථුසභඤ්ච සීහඤ්ච භක්ඛයන්ති මිගාධමා.

702. ඉමං සො සයනං සෙති යයිමං පස්සසි සාරථි,
යො වාචං සන්ධිභෙදස්ස පිසුනස්ස නිබොධති.