676. අවසිම්භා තවාගාරෙ නිච්චං සක්කතපූජිතා,
ත්වමෙව දානි ච’කරි. හන්ද රාජ වජාමහං.

677. යො වෙ කතෙ පටිකතෙ කිබ්බිසෙ පටිකිබ්බිසෙ,
එවං තං සම්මති වෙරං මස කුන්තිනි මාගමා.

678. න කතස්ස ච කත්තා ච මෙත්ති සන්ධීයතෙ පුන,
හදයං නානුජානාති ගච්ඡඤ්ඤෙව රථෙසභ.

679. කතස්ස චෙව කත්තා ච මෙත්ති සන්ධීයතෙ පුන,
ධීරානං නො ච බාලානං වස කුන්තිනි මාගමා’ති.

680. යො නීලියං මණ්ඩයති සණ්ඩාසෙන විහඤ්ඤති,
තස්ස සා වසමන්වෙතු යා තෙ අම්බෙ අවාහරි.

681. වීසං වා පඤ්චවීසං වා ඌනතිංසංව ජාතියා,
තාදිසා පතිමාලද්ධා යා තෙ අම්බෙ අවාහරි.

682. දීඝං ගච්ඡතු අද්ධානං එකිකා අභිසාරියා,
සඞ්කෙතෙ පති මාද්දස යා තෙ අම්බෙ අවාහරි.

683. අලඞ්කතා සුවසනා මාලිනී චන්දනුස්සදා,
එකිකා සයනෙ සෙතු යා තෙ අම්බෙ අවාහරීති.

684. වනං යදග්ගි දහති පාවකො කණ්හවත්තනී,
කථං කරොසි පචලක එවං දන්ධපරක්කමො.

685. බහූනි රුක්ඛජිද්දානි පථව්යා විවරානි ච,
තානි චෙ නාභිසම්භොම හොති නො කාලපරියායො.

686. යො දන්ධකාලෙ තරති තරණීයෙ ච දන්ධති,
සුක්ඛපණ්ණංව අක්කම්ම අත්ථං භඤ්ජති අත්තනො.

687. යො දන්ධකාලෙ දන්ධෙති තරණීයෙ ච තාරයි,
සසීව රත්තිං විභජං තස්සත්ථො පරිපූරතී’ති.

688. මනුස්සින්දං ජහිත්වාන සබ්බකාමසමිද්ධිනං,
කථං නු භගවා කෙසි කප්පස්ස රමති අස්සමෙ.

689. සාධුනි රමණීයානි සන්ති වක්ඛා මනොරමා,
සුභාසිතානි කප්පස්ස නාරද රමයන්ති මං.

690. සාලීනං ඔදනං භුඤ්ජෙ සුචිමංසූපසෙචනං,
කථං සාමාකනීවාරං අලොණං ඡාදයන්ති තං.

691. අසාදුං යදි වා සාදුං අප්පං වායදි වා බහුං,
විස්සත්ථො යත්ථ භුඤ්ජෙය්ය විස්සාසපරමා රසාති.

692. සබ්බායසං කූටමතිප්පමාණං
පග්ගය්හ සො තිට්ඨති අන්තලික්ඛෙ,
රක්ඛාය මෙ ත්වං විහිතො නුසජ්ජ
උදාහු මෙ වායමසෙ වධාය.

693. දූතො අහං රාජිධ රක්ඛසානං.
වධාය තුය්හං පහිතොහමස්මි,
ඉන්දො ච තං රක්ඛති දෙවරාජා
තෙනුත්තමඞ්ගං න තෙ ඵාලයාමි.