644. බ්රහා පවඩ්ඪකායො සො දිඝදාඨො ච ජම්බුක,
න ත්වං තම්හි කුලෙ ජාතො යත්ථ ගණ්හන්ති කුඤ්ජරං.

645. අසීහො සීහමානෙන යො අත්තානං විකුබ්බති,
කොත්ථුව ගජමාසජ්ජ සෙති භූම්යා අනුත්ථුනං.

646. යසස්සිනො උත්තමපුග්ගලස්ස
සඤ්ජාතඛන්ධස්ස මහබ්බලස්ස,
අසමෙක්ඛිය ථාමබලූපපත්තිං
ස සෙති නාගෙන හතොව ජම්බුකො.

647. යො චිධ කම්මං කුරුතෙ පමාය
ථාමබලං අත්තනි සංවිදිත්වා,
ජප්පෙන මන්තෙන සුභාසිතෙන
පරික්ඛවා සො විපුලං ජිනාතී’ති.

648. තිණං තිණන්ති ලපසි කො නු තෙ තිණමාහරි,
කින්නු තෙ තිණකිච්චත්ථි තිණමෙව පභාසසි.

649. ඉධාගමා බ්රහ්මාචාරී බ්රහා ඡත්තො බහුස්සුතො,
සො මෙ සබ්බං සමාදාය තිණං නික්ඛිප්ප ගච්ඡති.

650. එවෙතං හොති කත්තබ්බ. අප්පෙන බහුමිච්ඡතා,
සබ්බං සකස්ස ආදානං අනාදානං තිණස්ස ච
චාටීසු පක්ඛිපිත්වාන තත්ථ කා පරිදෙවනා.

651. සීලවන්තො න කුබ්බන්ති බාලො සීලානි කුබ්බති,
අනිච්චසීලං දුස්සීල්යං කිං පණ්ඩිච්චං කරිස්සතී’ති.

652. න තෙ පීඨමදායිම්හා න පානං නපි භොජනං,
බ්රහ්මචාරි ඛමස්සු මෙ එතං පස්සාම අච්චයං.

653. නෙවාභිසජ්ජාමි න චාපි කුප්පෙ
න චාපි මෙ අප්පියමාසි කිඤ්චි,
අථොපි මෙ ආසි මනොවිතක්කො
එතාදිසො නූන කුලස්ස ධම්මො.

654. එසස්මාකං කුලෙ ධම්මො පිතුපිතාමහො සදා,
ආසනං උදකං පජ්ජං සබ්බෙතං නිපදාමසෙ.

655. එසස්මාකං කුලෙ ධම්මො පිතුපිතාමහො සදා,
සක්කච්චං උපතිට්ඨාම උත්තමං විය ඤාතකන්ති.

656. විදිතං ථුසං උන්දුරානං විදිතං පන තණ්ඩුලං
ථුසං ථූලං විවජ්ජෙත්වා තණ්ඩුලං පන ඛාදරෙ.

657. යා මන්තනා අරඤ්ඤස්මිං යා ච ගාමෙ නිකණ්ණිකා,
යඤ්චෙතං ඉතිචිතිච එතම්පි විදිතං මයා.

658. ධම්මෙන කිර ජාතස්ස පිතා පුත්තස්ස මක්කටො,
දහරස්සෙව සන්තස්ස දන්තෙහි ඵලමච්ඡිදා.

659. යමෙතං පරිසප්පසි අජකාණොව සාසපෙ,
යොපායං හෙට්ඨතො සෙසි එතම්පි විදිතං මයා’ති.