572. මතමතමෙව රොදථ
න හි තං රොදථ යො මරිස්සති,
සබ්බෙව සරීරධාරිනො
අනුපුබ්බෙන ජහන්ති ජීවිතං.

573. දෙවමනුස්සා චතුප්පදා
පක්ඛිගණා උරගා ච භොගිනො.
සම්හි සරීරෙ අනිස්සරා
රමමානාව ජහන්ති ජීවිතං.

574. එවඤ්චලිතං අසණ්ඨිතං
සුඛදුක්ඛං මනුජෙසු අපෙක්ඛිය,
කන්දිතරුදිතං නිරත්ථකං
කිං වො සොකගණාභිකිරරෙ.

575. ධුත්තා සොණ්ඩා අකතා
බාලා සූරා අයොගිනො,
ධීරං මඤ්ඤන්ති බාලොති
යෙ ධම්මස්ස අකොවිදාති.

576. යන්තං වසන්තසමයෙ කණවෙරෙසු භානුසු,
සාමං බාහාය පීළෙසි සා තං ආරොග්යමබ්රවි.

577. අම්භො න කිර සද්ධෙය්යං වාතො පබ්බතං වහෙ,
පබ්බතඤ්චෙ වහෙ වාතො සබ්බම්පි යඨවිං වහෙ;
යත්ථ සාමා කාලකතා සා මං ආරොග්යමබ්රවි.

578. න චෙව සා කාලකතා න ච සා අඤ්ඤමිච්ඡති,
එකභත්තා කිර සාමා තමෙව අභිකඞ්ඛති.

579. අසන්ථුතං මං චිරසන්ථුතෙන
නිමීනි සාමා අධුවං ධුවෙන,
මයාපි සාමා නිමිනෙය්ය අඤ්ඤං
ඉතො අහං දූරතරං ගමිස්සන්ති.

580. සුසුඛං වත ජීවාමි ලභාමි චෙව භුඤ්ජිතුං
පරිපන්ථෙ ච තිට්ඨාමි කානු භන්තෙ ගතී මම.

581. මනො චෙ තෙ න පනමති පක්ඛී පාපස්ස කම්මුනො,
අව්යාවටස්ස භද්රස්ස න පාපමුපලිප්පති.

582. ඤාතකො නො නිසින්නොති බහු ආගච්ඡතෙ ජනො,
පටිච්ච කම්මං ඵුසති තස්මිං මෙ සඞ්කතෙ මනො.

583. පටිච්ච කම්මං න ඵුසති මනො චෙ නප්පදුස්සති,
අප්පොස්සුක්කස්ස භද්රස්ස න පාපමුපලිප්පතී’ති.

584. සුච්චජං වත නච්චජි වාචාය අදදං ගිරිං,
කිම්හි තස්සං චජන්තස්ස වාචා අදද පබ්බතං.

585. යං හි කයිරා තං හි වදෙ යං න කයිරා න තං වදෙ,
අකරොන්තං භාසමානං පරිජානන්ති පණ්ඩිතා.

586. රාජපුත්ත නමො ත්යුත්ථු සච්චෙ ධම්මෙ ඨිතොවසි,
යස්ස තෙ ව්යසනං පත්තො සච්චස්මිං රමතෙ මනො.

587. යා දළිදදී දළිද්දස්ස අඩ්ඪා අඩ්ඪස්ස කිත්තිමා,
ස හිස්ස පරමා භරියා සහිරඤ්ඤස්ස ඉත්ථියොති.

අථ චොරසකස්සපඛන්තිවරො
දුජ්ජිවිතතා ච වරාඵරුසා,
අථ සසමතඤ්ච වසන්තසුඛං
සුච්චජං වත නච්චජිතා ච දස.