584. සුච්චජං වත නච්චජි වාචාය අදදං ගිරිං,
කිම්හි තස්සං චජන්තස්ස වාචා අදද පබ්බතං.

585. යං හි කයිරා තං හි වදෙ යං න කයිරා න තං වදෙ,
අකරොන්තං භාසමානං පරිජානන්ති පණ්ඩිතා.

586. රාජපුත්ත නමො ත්යුත්ථු සච්චෙ ධම්මෙ ඨිතොවසි,
යස්ස තෙ ව්යසනං පත්තො සච්චස්මිං රමතෙ මනො.

587. යා දළිදදී දළිද්දස්ස අඩ්ඪා අඩ්ඪස්ස කිත්තිමා,
ස හිස්ස පරමා භරියා සහිරඤ්ඤස්ස ඉත්ථියොති.

අථ චොරසකස්සපඛන්තිවරො
දුජ්ජිවිතතා ච වරාඵරුසා,
අථ සසමතඤ්ච වසන්තසුඛං
සුච්චජං වත නච්චජිතා ච දස.

588. මනුස්සස්සෙව තෙ සීසං හත්ථපාදා ච වානර,
අථ කෙන නු වණ්ණෙන අගාරං තෙ න විජ්ජති.

589. මනුස්සස්සෙව මෙ සීසං හත්ථපාදා ච සිඞ්ගිල
යාහු සෙට්ඨා මනුස්සෙසු සා මෙ පඤ්ඤා න විජ්ජති.

590. අනවට්ඨිතචිත්තස්ස ලහුචිත්තස්ස දුබ්භිනො,
නිච්චං අද්ධුවසීලස්ස සුචිභාවො න විජ්ජති.

591. සො කරස්සු අනුභාවං වීතිවත්තස්සු සීලියං.
සීතවාතපරිත්තාණං කරස්සු කුටිකං කපීති.

592. දද්දභායති භද්දන්තෙ යස්මිං දෙසෙ වසාමහං,
අහම්පෙතං න ජානාමි කිමෙතං දද්දභායති.

593. බෙලුවං පතිතං සුත්වා දද්දභන්ති සසො ජවි,
සසස්ස වචනං සුත්වා සන්තත්තා මිගවාහිනී.

594. අප්පත්වා පදවිඤ්ඤාණං පරඝොසානුසාරිනො,
පමාදපරමා බාලා තෙ හොන්ති පරපත්තියා.

595. යෙ ච සීලෙන සම්පන්නා පඤ්ඤායුපසමෙ රතා,
‘ආරකා විරතා ධීරා න හොන්ති පරපත්තියාති.

596. ද්වයං යාචනකො රාජ බ්රහ්මදත්ත නිගච්ඡති,
අලාභං ධනලාභං වා එවං ධම්මා හි යාචනා.

597. යාචනං රොදනං ආහු පඤ්චාලානං රථෙසභ,
යො යාචනං පච්චක්ඛාති තමාහු පටිරොදනං.

598. මා මද්දසංසු රොදන්තං පඤ්චාලා සුසමාගතා,
තුවං වා පටිරොදන්තං තස්මා ඉච්ඡාමහං රහො.