516. අනුත්තරෙ කාමගුණෙ සමිද්ධෙ
භුත්වාන පුබ්බෙ වසි එකරාජා,
සොදානි දුග්ගෙ නරකම්භි ඛිත්තො
නප්පජහෙ වණ්ණබලං පුරාණං.

517. පුබ්බෙව ඛන්ති ච තපො ච මය්හං
සම්පත්ථිතා දබබසෙනා අහොසි,
තංදානි ලද්ධාන කථන්නු රාජ
ජහෙ අහං වණ්ණබලං පුරාණං.

518. සබ්බං කිරෙව පරිනිට්ඨිතානි
යසස්සිනං පඤ්ඤවන්තං විසය්හ,
යසො ච ලද්ධා පුරිමං උළාරං
නප්පජහෙ වණ්ණබලං පුරාණං.

519. පනුජ්ජ දුක්ඛෙන සුඛං ජනින්ද
සුඛෙන චා දුක්ඛමසය්හසාහි,
උභයත්ථ සන්තො අභිනිබ්බුතත්තා
සුඛෙ ච දුක්ඛෙ ච භවන්ති තුල්යා’ති

520. ඉමානි මං දද්දර තාපයන්ති
වාචාදුරුත්තානි නුස්සලොකෙ,
මණ්ඩූකභක්ඛා උදකන්තසෙවි
ආසීවිසං මං අවිසා සපන්ති.

521. සකා රට්ඨා පබ්බාජිතො අඤ්ඤං ජනපදං ගතො,
මහන්තං කොට්ඨං කයිරාථ දුරුත්තානං නිධෙතවෙ.

522. යත්ථ පොසං න ජානන්ති ජාතියා විනයෙන වා,
න තත්ථ මානං කයිරාථ වසමඤ්ඤාතකෙ ජනෙ.

523. විදෙසවාසං වසතො ජාතවෙදසමෙනපි,
ඛමිතබ්බං සපඤ්ඤෙන අපි දාසස්ස තජ්ජිතන්ති.

524. නත්ථි ලොකෙ රහො නාම පාපකම්මං පකුබ්බතො,
පස්සන්ති වනභූතානි තං බාලො මඤ්ඤතී රහො.

525. අහං රහො න පස්සාමි සුඤ්ඤං වාපි න විජ්ජති,
යත්ථ අඤ්ඤං න පස්සාමි අසුඤ්ඤං හොති තං මයා.

526. දුජ්ජච්චො ච සුජච්චො ච නන්දො ච සුඛවචඡකො,
වෙජ්ජො අද්ධුවසීලො ච තෙ ධම්මං ජහුමත්ථිකා.

527. බ්රාහ්මණෙ ච කථං ජහෙ සබ්බධම්මානපාරගූ,
යො ධම්මමනුපාලෙති ධිතිමා සච්චනික්කමොති.

528. තිං අණ්ඩකා ඉමෙ දෙව නික්ඛිත්තා කංසමල්ලකෙ,
උපලොහිතකා වග්ගු තං මෙ අක්ඛාහි පුච්ඡිතො.

529. යානි පුරෙ ත්වං දෙවි භණ්ඩු නන්තකවාසිනී,
උච්ඡඞ්ගහත්ථා පචිනාසි තස්සා තෙ කොලියං ඵලං.

530. උඩ්ඩය්හතෙ න රමති භොගා විප්පජහන්ති තං,
තත්ථෙවිමං පටිනෙථ යත්ථ කොලං පචිස්සති.