3733. දෙවතානුසි ගන්ධබ්බො ආදු සක්කො පුරින්දදො,
මනුස්සභූතො ඉද්ධිමා කථං ජානෙමු තං මයං.

3734. නම්හි දෙවො න ගන්ධබ්බො නම්හි සක්කො පුරින්දදො,
මනුස්සභූතො ඉද්ධිමා එවං ජානාහි භාරත.

3735. කතරූපමිදං භොතා වෙය්යාවච්චං අනප්පකං,
දෙවම්භි වස්සමානම්හි අනොවස්සං භවං අකා.

3736. තතො වාතාතපෙ ඝොරෙ සීතච්ඡායං භවං අකා,
තතො අමිත්තමජ්ඣෙ ච සරතාණං භවං අකා.

3737. තතො ඵීතානි රට්ඨානි වසිනො තෙ භවං අකා,
තතො එකසතං ඛත්යෙ අනුයන්තෙ භවං අකා.

3738. පතීතාස්සු මයං භොතො වර තං භඤ්ඤමිච්ඡසි,
හත්ථියානං අස්සරථං නාරියො ච අලඞ්කතා
නිවෙසනානි රම්මානි මයං භොතො දදාමසෙ.

3739. අථ වා අඞ්ගෙ වා මගධෙ මයං භොතො දදාමසෙ,
අථ වා අස්සකාවන්තිං සුමනා දම්ම තෙ මයං

3740. උපඩ්ඪං වාපි රජ්ජස්ස මයං භොතො දදාමසෙ,
සචෙ තෙ අත්ථො රජ්ජෙන අනුසාස යදිච්ඡසි.

3741. න මෙ අත්ථොපි රජ්ජෙන නගරෙන ධනෙන වා,
අථොපි ජනපදෙන අත්ථො මය්හං න විජ්ජති.

3742. භොතොව රට්ඨෙ විජිතෙ අරඤ්ඤෙ අත්ථි අස්සමො,
පිතා මය්හං ජනෙත්තී ච උභො සම්මන්ති අස්සමෙ.

3743. තෙසාහං පුබ්බාචරියෙසු පුඤ්ඤං න ලභාමි කාතවෙ,
භවන්තං අජ්ඣාචරං කත්වා සොණං යාචාමු සංවරං.

3744. කරොමි තෙ තං වචනං යං මං භණසි බ්රාහ්මණ,
එතඤ්ච ඛො නො අක්ඛාහි කීවන්තො හොන්තු යාචකා.

3745. පරොසතං ජානපදා මහාසාලා ච බ්රාහ්මණා
ඉමෙ ච ඛත්තියා සබ්බෙ අභිජාතා යසස්සිනො
භවඤ්ච රාජා මනොජො අලං හෙස්සන්ති යාචකා.

3746. හත්ථි අස්සෙ ච යොජෙන්තු රථං සන්තය්හ සාරථි,
ආබන්ධනානි ගණ්හථ පාදෙසුස්සාරයං ධජෙ
අස්සමං තං ගමිස්සාමි යත්ථ සම්මති කොසියො.

3747. තතො ච රාජා පායාසි සෙනාය චතුරඞ්ගිනී,
අගමාසි අස්සමං රම්මං යත්ථ සම්මති කොසියො.

3748. කස්ස කාදම්බයො කාජො වෙහාසං චතුරඞ්ගුලං,
අංසං අසම්ඵුසං එති උදහාරස්ස ගච්ඡතො.

3749. අහං සොණො මහාරාජ, තාපසො සහිතබ්බතො,
භරාමි මාතාපිතරො රත්තින්දිවමතන්දිතො.

3750. වනෙ ඵලඤ්ච මූලඤ්ච ආහරිත්වා දිසම්පති,
පොසෙමි මාතාපිතරො පුබ්බෙකතමනුස්සරං.

3751. ඉච්ඡාමි අස්සමං ගන්තුං යත්ථ සම්මති කොසියො,
මග්ගං නො සොණ අක්ඛාහි යෙන ගච්ඡෙමු අස්සමං.

3752. අයං එකපදී රාජ යෙනෙතං මෙඝසන්නිහං.
කොවිළාරෙහි සඤ්ඡන්නං එත්ථ සම්මති කොසියො.

3753. ඉදං වත්වාන පක්කාමි තරමානො මහාඉසි,
වෙහාසෙ අන්තලික්ඛස්මිං අනුසාසිත්වාන ඛත්තියෙ.

3754. අස්සමං පරිමජ්ජිත්වා පඤ්ඤාපෙත්වාන ආසනං,
පණ්ණසාලං පවිසිත්වා පිතරං පටිබොධයි.