263. අපි වීරක පස්සෙසි සකුණං මඤ්ජුභාණකං,
මයූරගීවසඞ්කාසං පතිං මය්හං සවිට්ඨකං.

264. උදකථලචරස්ස පක්ඛිනො නිච්චං ආමකමච්ඡභොජිනො,
තස්සානුකරං සවිට්ඨකො සෙවාලෙ පළිගුණ්ඨිතො මතො’ති.

265. සොභති මච්ඡො ගඞ්ගෙය්යො අථො සොභතී යාමුනො,
චතුප්පදායං පුරිසො නිග්රොධපරිමණ්ඩලො,
ඊසකායනගීවො ච සබ්බෙව අතිරොචති.

266. යං පුච්ඡිතො නං තං අක්ඛා අඤ්ඤං අක්ඛාති පුච්ඡිතො,
අත්තප්පසංසකො පොසො නායං අස්මාක රුච්චතී’ති.

267. ඉඞ්ඝ වද්ධමයං පාසං ඡින්ද දන්තෙහි කච්ඡප,
අහං තථා කරිස්සාමි යථා නෙහිති ලුද්දකො.

268. කච්ඡපො පාවිසී වාරිං කුරුඞ්ගො පාවිසී වනං.
සතපත්තො දුමග්ගම්භා දූරෙ පුත්තෙ අපානයීති.

269. අයමස්සකරාජෙන දෙසො විචරිතො මයා,
අනුකාමයානුකාමෙන පියෙන පතිනා සහ.

270. නවෙන සුඛදුක්ඛෙන පොරාණං අපිථීයති,
තස්මා අස්සකරඤ්ඤාව කීටො පියතරො මමන්ති.

271. අලමෙතෙහි අම්බෙහි ජම්බූහි පනසෙහි ච,
යානි පාරං සමුද්දස්ස වරං මය්හං උදුම්බරො.

272. මහතී වත තෙ බොන්දි න ච පඤ්ඤා තදූපිකා,
සුංසුමාර වඤ්චිතො මෙසි ගච්ඡදානි යථා සුඛන්ති.

273. දිට්ඨා මයා වනෙ රුක්ඛා අස්සකණ්ණවිභීටකා,
න තානි එවං සක්කන්ති යථා ත්වං රුක්ඛ සක්කසි.

274. පුරාණකක්කරො අයං භෙත්වා පඤ්ජරමාගතො,
කුසලො වාළපාසානං අපක්කමති භාසතී’ති.

275. අම්භො කො නාමයං රුක්ඛො සීනපත්තො සකණ්ටකො,
යත්ථ එකප්පහාරෙන උත්තමඞ්ගං විඝාටිතං.

276. ආචරිතායං විතුදං වනානි
කට්ඨඞ්ගරුක්ඛෙසු අසාරකෙසු,
අථාසදා ඛදිරං ජාතසාරං
යත්ථබ්හිදා ගරුළො උත්තමඞ්ගන්ති.

දළ්හබන්ධනහංසවරො ච පුන
විරූපක්ඛ සවිට්ඨකමච්ඡවරො
සකුරුඞ්ගසඅස්සකඅම්බවරො
පුන කක්කරකො ගරුළෙන දස.