249. උභයං මෙ න ඛමති උභයං මෙ න රුච්චති,
යා චායං කොට්ඨමොතිණ්ණා න දස්සං ඉති භාසති,

250. තං තං ගාමපති බ්රූමි කදරෙ අප්පස්මිං ජීවිතෙ,
ද්වෙ මාසෙ කාරං කත්වාන මංසං ජරග්ගගවං කිසං,
අප්පත්තකාලෙ චොදෙසි තම්පි මය්හං න රුච්චති.

251. සරීරදව්යං වද්ධව්යං සොජච්චං සාධුසීලියං,
බ්රාහ්මණන්ත්වෙව පුච්ඡාම කං නු තෙසං වණිම්භසෙ.

252. අත්ථො අත්ථි සරීරස්මිං වද්ධව්යස්ස නමො කරෙ,
අත්ථො අත්ථි සුජාතස්මිං සීලං අස්මාක රුච්චතීති.

අම්භොරුහකරූපවතීමුසලො
පවසන්ති සපඤ්චමපොක්ඛරණි,
අථ මුත්තිමවාණිජ උම්භයතෙ
චිරආගත කොට්ඨ සරීර දස.

253. න තං දළ්හං බන්ධනමාහු ධීරා
යදායසං දාරුජං බබ්බජඤ්ච,
සාරත්තරත්තා මණිකුණ්ඩලෙසු
පුත්තෙසු දාරෙසු ච යා අපෙඛා.

254. එතං දළ්හං බන්ධනමාහු ධීරා
ඔහාරිනං සිථිලං දුප්පමුඤ්චං,
එතම්පි ඡෙත්වාන වජන්ති ධීරා
අනපෙක්ඛිනො කාමසුඛං පහායාති.

255. හංසා කොඤ්චා මයූරා ච හත්ථියො පසදා මිගා,
සබ්බෙ සීහස්ස භායන්ති නත්ථි කායස්මිං තුල්යතා.

256. එවමෙව මනුස්සෙසු දහරො චෙපි පඤ්ඤවා
සො හි තත්ථ මහා භොති නෙව බාලො සරීරවා’ති.

257. විරූපක්ඛෙහි මෙ මෙත්තං මෙත්තං එරාපථෙහි මෙ,
ඡබ්බ්යාපුත්තෙහි මෙ මෙත්තං මෙත්තං කණ්හාගොතමකෙහි ච.

258. අපාදකෙහි මෙ මෙත්තං මෙත්තං දිපාදකෙහි මෙ,
චතුප්පදෙහි මෙ මෙත්තං මෙත්තං බහුප්පදෙහි මෙ.

259. මා මං අපාදකො හිංසි මා මං හිංසි දිපාදකො,
මා මං චතුප්පදො මෙ හිංසි මා මං හිංසි බහුප්පදො

260. සබ්බෙ සත්තා සබ්බෙ පාණා සබ්බෙ භූතා ච කෙවලා,
සබ්බෙ භද්රානි පස්සන්තු මා කඤ්චි පාපමාගමා.